DÖVLƏT SƏRHƏD XİDMƏTİNİNSAHİL MÜHAFİZƏSİNİN İNKİŞAFINA ÖLKƏ RƏHBƏRLİYİNİN DİQQƏT VƏ QAYĞISI DAİM ARTIR
DSX-nin rəisi, Sərhəd Qoşunlarının Komandanı general-leytenant Elçin Quliyevin iştirak etdiyi tədbirdə hərbi hissənin Döyüş bayrağı meydana gətirilmişdir. Həmçinin Hərbi-dəniz bayrağı döyüş sırasına daxil edilən yeni sərhəd gözətçi gəmisinin qafelində (bayraq ağacında) qaldırılmışdır.
DSX rəisinin sahil mühafizəsi üzrə müavini, Sahil Mühafizəsinin rəisi general-mayor İlham Mehdiyev hərbi hissənin tarixi barədə danışmış, ölkə rəhbərliyinin DSX-nin Sahil Mühafizəsinin inkişafına diqqət və qayğısını qeyd etmişdir.
Elçin Quliyev döyüş sırasına daxil edilən gəminin 2003-cü ildə ümummilli lider Heydər Əliyevin tapşırığı ilə əsaslı təmir edilərək Dövlət Neft Şirkətindən alınıb DSX-nin Sahil Mühafizəsinə verildiyini diqqətə çatdırmış, ulu öndərin dəniz sərhədlərimizin mühafizəsinə verdiyi xüsusi diqqətdən, bu gün Prezident İlham Əliyevin qayğısı sayəsində DSX-nin dəniz sərhədlərinin mühafizəsi işində yüksək inkişaf dinamikasına nail olunmasından danışmışdır. Yeni sərhəd gözətçi gəmisinin hər cür hava şəraitində üzmə qabiliyyətinə malik olduğu, dənizdə Dövlət sərhədinin daha etibarlı mühafizə edildiyi, Xəzərin Azərbaycana aid hissəsində bioloji resursların, enerji ehtiyatlarının, sualtı qaz-neft ixrac boru kəmərlərinin və platformaların qorunduğu, beynəlxalq terrorizmə, qeyri-leqal miqrasiyaya və qaçaqmalçılığa qarşı mübarizə aparıldığı xatırladılmış, bu istiqamətdə Azərbaycan Respublikası Prezidentinin qarşıya qoyduğu vəzifələrin daha layiqincə yerinə yetiriləcəyi vurğulanmışdır.
Hərbi hissənin şəxsi heyətinin sosial-məişət, xidməti-döyüş fəaliyyətinin yaxşılaşdırılması, Azərbaycanın sərhədlərini etibarlı surətdə qorumağa qadir olan və müasir tələblər səviyyəsinə çatan bir hərbi birləşməyə çevrilməsi barədə ətraflı məlumat verilmişdir.
Sahil Mühafizəsinin xidmətdə fərqlənmiş bir qrup hərbi qulluqçusuna medal və mükafatlar təqdim edilmişdir.
Mərasimdə döyüş sırasına daxil edilən gəminin şəxsi heyəti tərəfindən qəza-xilasetmə avadanlıqları nümayiş etdirilmiş və gəmiyə baxış keçirilmişdir.
Mərasim incəsənət ustalarının maraqlı konsert proqramı ilə başa çatmışdır.
