Dünya Azərbaycanlılarının Həmrəylik Günü ilə bağlı fiziki imkanları məhdud insanlar üçün tədbir keçirilib
Bakı, 25 dekabr, AZƏRTAC
Dekabrın 25-də Dünya Azərbaycanlılarının Həmrəylik Günü ilə bağlı fiziki imkanları məhdud istedadlı insanlar üçün bayram tədbiri keçirilib. Tədbirdə 80-dən çox fiziki imkanları məhdud istedadlı şəxs iştirak edib.
AZƏRTAC xəbər verir ki, əvvəlcə “Azərbaycan üçün oxu” layihəsi çərçivəsində Xalq şairi Səməd Vurğunun “Azərbaycan” şeiri əsasında hazırlanmış videoçarx nümayiş olunub. Videoçarxda şeir ziyalılar, o cümlədən bir sıra tanınmış fiziki imkanları məhdud insanlar tərəfindən səsləndirilib və ümummilli lider Heydər Əliyevin söylədiyi bəndlə bitib.
Sonra şəhidlərimizin xatirəsi bir dəqiqəlik sükutla yad edilib və Azərbaycan Respublikasının dövlət himni səsləndirilib.
Tədbirdə çıxış edən Milli Məclisin deputatı Qənirə Paşayeva bildirib ki, fiziki imkanları məhdud insanlar müxtəlif beynəlxalq tədbirlərdə, yarışlarda ölkəmizi uğurla təmsil edib, üçrəngli bayrağımızı zirvələrdə dalğalandırıblar. Vətənimiz naminə göstərdikləri fəaliyyətdə fiziki məhdudiyyətləri onlara mane olmayıb.
Dünya Azərbaycanlılarının Həmrəylik Gününün təsis olunması tarixindən danışan Q.Paşayeva həmin bayramın 50 milyondan çox azərbaycanlını birləşdirdiyini qeyd edərək deyib: “Bu bayram ulu öndər Heydər Əliyevin təşəbbüsü ilə təsis olunub. Dünyanın harasında yaşamağımızdan asılı olmayaraq, bu bayram bizi birləşdirir və vətənimiz Azərbaycanın ətrafında həmrəy olmağa səsləyir”.
“Regional Hüquqi və İqtisadi Maarifləndirmə” İctimai Birliyinin sədri Arzu Bağırova ölkəmizdə həssas qruplara göstərilən diqqətdən, fiziki imkanları məhdud insanların potensialının üzə çıxarılmasına yönələn tədbirlərin əhəmiyyətindən bəhs edib.
Sonra çıxış edən Əmək və Əhalinin Sosial Müdafiəsi naziri Sahil Babayev Prezident İlham Əliyevin tapşırıqlarına uyğun olaraq nazirliyin həssas qruplarla, o cümlədən əlilliyi olan şəxslərlə bağlı layihələrini, onların istedad və qabiliyyətlərinin yaradıcılıq potensiallarının aşkara çıxarılması və ictimaiyyətə tanıdılması üçün aparılan işləri qeyd edib. Bu sahədə Birinci vitse-prezident, Heydər Əliyev Fondunun prezidenti Mehriban Əliyevanın nəcib layihə və təşəbbüslərini diqqətə çatdırıb, həmçinin Fondun vitse-prezidenti Leyla Əliyevanın dəstəyini vurğulayıb.
Sahil Babayev nazirliyin dəstəyi ilə ötən ilin dekabrında Azərbaycan və ingilis dillərində 278 səhifəlik “Əlillik qüsur deyil” kitab-albomunun, görmə imkanları məhdud şəxslərin şeirlərindən ibarət “Zülməti dələn işıq” kitabının nəşr edildiyini deyib. O bildirib ki, eyni zamanda, nazirliyin sifarişi və dəstəyi ilə icra olunan layihələrin bir istiqaməti də Milli qəhrəmanların tanıdılması kampaniyasının təşkilinə xidmət edir. Bu istiqamətdə aparılan işlər də Milli qəhrəmanlarımızın cəmiyyətdə daha yaxından tanıdılması ilə yanaşı, gənclərimizin vətənpərvərlik duyğularının gücləndirilməsinə öz töhfəsini verir.
Nazir əlilliyin qüsur olmadığını qeyd edib və fiziki imkanları məhdud insanların öz bacarıq, qabiliyyət və istedadlarına görə xüsusilə seçildiklərini diqqətə çatdırıb.
Daha sonra çıxış edənlər - Paralimpiya çempionu, Qarabağ müharibəsi əlili İlham Zəkiyev, sağlamlıq imkanları məhdud istedadlı gənclərdən Mətanət Qudsi, fiziki imkanları məhdud idmançı, çempion Aynur Məmmədova, Əməkdar incəsənət xadimi, şair Baba Vəziroğlu həssas qruplara göstərilən diqqətdən məmnunluqlarını ifadə edib, fiziki imkanların məhdudluğunun uğur qazanmağa əngəl törətmədiyini vurğulayıblar.
Bundan başqa, bayram tədbirində “Regional Hüquqi və İqtisadi Maarifləndirmə” İctimai Birliyi tərəfindən nəşr etdirilmiş “Vətən, Bayraq, Millət” şeirlər antologiyasının təqdimatı olub. Vətənpərvərlik mövzularında ilk dəfə ən gözəl 100 şeirin antologiya şəklində toplandığı kitabda Heydər Əliyev Fondunun vitse-prezidenti Leyla Əliyevanın müəllifi olduğu şeir də yer alıb. Kitab gənclərimizdə vətənpərvərlik duyğularının gücləndirilməsinə, dövlət atributlarımıza daha çox sevginin aşılanması baxımından bir töhfə məqsədi daşıyır.
Bədii hissə ilə davam edən tədbirdə incəsənət nümayəndələrinin və fiziki imkanları məhdud şəxslərin ifasında mahnı və şeirlər səsləndirilib.
Bununla yanaşı, tədbirdə əlilliyi olan şəxslərin, o cümlədən Əmək və Əhalinin Sosial Müdafiəsi Nazirliyinin sosial müəssisələrinin sakinlərinin əl işləri təqdim olunub.
Tədbir zamanı fiziki imkanları məhdud şəxslərə bayram hədiyyələri də təqdim edilib.
Bölmənin digər xəbərləri
