DÜNYA


Gürcüstanda Müstəqillik Günü qeyd olunub

Tbilisi, 26 may, AZƏRTAC

Mayın 26-da Gürcüstanda ilk müstəqil respublikanın qurulmasının 101-ci ildönümü geniş qeyd olunub.

AZƏRTAC xəbər verir ki, paytaxt Tbilisi ilə yanaşı, ölkənin bütün bölgələrində Müstəqillik Günü münasibətilə təntənəli tədbirlər keçirilib. Əsas tədbir paytaxt Tbilisidəki Azadlıq meydanında və mərkəzi Rustaveli prospektində təşkil olunub. Şəhər sakinlərinə və qonaqlara müxtəlif sərgilər, konsert proqramları, əyləncəli oyunlar, teatr tamaşaları təqdim edilib.

Azadlıq meydanında keçirilən rəsmi tədbirdə Prezident Salome Zurabişvili, Baş Nazir Mamuka Baxtadze və başqaları çıxış edərək xalqı bayram münasibətilə təbrik ediblər. Meydanda hərbi çağırışçıların andiçmə mərasimi keçirilib.

Bayram tədbirləri çərçivəsində yerli vaxtla saat 17:10-da bütün ölkə ərazisində - mərkəzi meydan və parklarda, ictimai nəqliyyatda Gürcüstanın dövlət himni ifa olunub. Eyni zamanda, dövlət himni Zuqduqi, Qori, Telavi, Ambrolauri şəhərlərində, rayon mərkəzlərində, Gürcüstan-Rusiya sərhədindəki Yuxarı Lars sərhəd keçid məntəqəsində də oxunub.

Gürcüstanın Müstəqillik Günü ölkənin xaricdəki diplomatik nümayəndəliklərində də müxtəlif mərasimlərlə qeyd edilir.

 

Xətayi Əzizov

AZƏRTAC-ın xüsusi müxbiri

Tbilisi

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.