İRANIN ƏHALİSİ BU İL TƏQRİBƏN 1 MİLYON NƏFƏR ARTACAQ

13.11.2003 [16:09]
Çap et
A⁺ A^-

AZƏRTAC-ın Tehrandan aldığı xəbərə görə, İran Statistika Mərkəzinin burada yayılmış bülletenində deyilir ki, bu il İranın əhalisi, təqribən 1 milyon nəfər artacaqdır. Bu ilin mart ayında İran əhalisinin sayı 65.540.224 nəfər təşkil etmişdir.

Keçən ilin göstəricilərinə görə, İran İşlam Respublikasının şəhərlərində 43.265.171 nəfər, kənd yerlərində 22.275.053 nəfər yaşayır.

Əhalisinin sayına görə, ən böyük əyalət Tehran əyalətidir. Onun əhalisi, təxminən 12 milyon nəfərdir. İranın paytaxtında isə bu ilin mart ayında 10 milyondan artıq adam qeydə alınmışdır.

Keçən il (İran təqvimi ilə bu ilin mart ayında başa çatmışdır) İranda 1.122.104 uşaq doğulmuşdur.