Rohit Ciqyasu: Şəhərlərin kortəbii inkişafı təbii fəlakət risklərini artırır
Bakı, 21 may, AZƏRTAC
Ekoloji və ərazi xüsusiyyətləri nəzərə alınmadan şəhərlərin kortəbii və xaotik inkişafı təbii fəlakət risklərini artırır, əhalinin bu mənfi proseslərə qarşı həssaslığını yüksəldir. Buna görə də şəhərsalmanın planlaşdırılması zamanı yalnız inkişaf tələbatı deyil, ətraf mühit və insanların təhlükəsizliyi üçün mümkün nəticələr də nəzərə alınmalıdır.
Bu barədə fikirlərini AZƏRTAC-a müsahibəsində hindistanlı tanınmış memar-restavrator və risklərin idarə olunması üzrə mütəxəssis Rohit Ciqyasu bölüşüb. O, mədəni irsin təbii fəlakətlərdən və iqlim dəyişikliklərindən mühafizəsi sahəsində dünyanın aparıcı ekspertlərindən biridir. Hazırda Beynəlxalq Mədəni Sərvətlərin Qorunması və Bərpası üzrə Araşdırma Mərkəzində (ICCROM) proqram meneceri vəzifəsində çalışır. O, daha əvvəl Ritsumeykan Asiya-Sakit Okean Universitetində UNESCO kafedrasına rəhbərlik edib.
Onun sözlərinə görə, müasir şəhərlərin əsas problemlərindən biri ərazilərin inkişafına kompleks yanaşmanın olmamasıdır. Ekspert qeyd edib ki, insan, təbiət və şəhər mühiti arasındakı qarşılıqlı əlaqənin nəzərə alınmaması daşqınlar, zəlzələlər və digər təbii fəlakətlər riskinin artmasına səbəb olur.
Ekspert vurğulayıb ki, iqlim dəyişiklikləri vəziyyəti daha da ağırlaşdırır. Dünyanın bir çox regionunda həm yağıntıların tezliyi, həm də intensivliyi artır ki, bu da daşqın problemini getdikcə daha ciddi edir. Bununla əlaqədar o, şəhər ərazilərinin dayanıqlı və ekoloji yönümlü inkişafına daha çox diqqət yetirilməsinə çağırıb.
Müxbir – Tamilla Məmmədova
Bölmənin digər xəbərləri
