Lea Ranalder: Dayanıqlı mənzil sistemi şəhər infrastrukturuna inteqrasiya olunmalıdır
Bakı, 21 may, AZƏRTAC
Mənzil sektorunun iqlim dəyişiklikləri və şəhər infrastrukturu ilə daha sıx əlaqələndirilməsi vacibdir.
AZƏRTAC xəbər verir ki, bunu Bakıda BMT-nin Ümumdünya Şəhərsalma Forumunun 13-cü Sessiyası (WUF13) çərçivəsində “Milli iqlim planlarının şəhər məzmunu ilə bağlı BMT-nin Məskunlaşma Proqramının (UN-Habitat) hesabatı” mövzusunda keçirilən tədbirdə BMT-nin Məskunlaşma Proqramının (UN-Habitat) hesabat koordinatoru Lea Ranalder deyib.
Onun sözlərinə görə, bir çox milli iqlim planlarında dəniz səviyyəsinin qalxmasının və maliyyə bazarlarının mənzil sektoruna təsiri kimi məsələlərə yer verilir: “Bu mövzuların bir araya gətirilməsi dayanıqlı və aşağı karbonlu mənzil sisteminin formalaşdırılması üçün mühüm əhəmiyyət daşıyır”.
“Bu, xüsusilə vacibdir, çünki dünyanın bir çox ölkəsində mənzil fondunun yaxın illərdə ən azı iki dəfə artacağı gözlənilir”, - deyə o vurğulayıb.
Lea Ranalder qeyd edib ki, mənzil məsələsinə artıq şəhər infrastrukturunun ayrılmaz hissəsi kimi yanaşma güclənir. Onun sözlərinə görə, mənzil təkcə ayrı bir bina kimi deyil, ətraf mühit və xidmətlərlə birlikdə planlaşdırılmalıdır.
O əlavə edib ki, drenaj sistemləri, enerji təminatı, nəqliyyat şəbəkələri və tullantıların idarə olunması kimi xidmətlər yaşayış məhəllələri ilə inteqrasiya edilməlidir.
“Hesab edirik ki, bu yanaşma mühüm irəliləyişdir. Çünki mənzil artıq yalnız tikili deyil, insanların həyat keyfiyyətini yaxşılaşdıran əsas vasitə və iqlim fəaliyyətinin başlanğıc nöqtəsi kimi qəbul olunur”, - deyə o vurğulayıb.
Bölmənin digər xəbərləri
