Lənkəran teatrında gənc aktyorlar üçün ustad dərslərinə start verilib
Lənkəran, 17 oktyabr, AZƏRTAC
Oktyabrın 16-dan Lənkəran Dövlət Dram Teatrında gənc aktyorlar üçün beş günlük ustad dərslərinə start verilib.
Teatrın ədəbi-dram hissə rəhbəri Ağaddin Babayev AZƏRTAC-ın bölgə müxbirinə bildirib ki, Mədəniyyət Nazirliyinin "Öyrədərək öyrənirəm" layihəsi çərçivəsində “Stanislavski sisteminin psixofizik etapları” mövzusunda gerçəkləşən məşğələləri Boris Şukin adına Moskva Teatr Akademiyasının məzunu, S.Vurğun adına Azərbaycan Dövlət Akademik Rus Dram Teatrının aktyoru Abdulla Elşadlı aparır.
Oktyabrın 21-nə kimi davam edəcək məşğələlər zamanı Stanislavski sisteminin 8 psixofizik elementləri və Vaxtanqov məktəbi əsasında "obraza ilkin addım" kimi "Təxmin olunmuş vəziyyətlər"də obraza etüdlər bölməsi keçiriləcək.
Abdulla Elşadlı ilkin variant kimi A.P.Çexovun "Təklif" vodevilindəki təklif olunmuş vəziyyətlərin içində Lənkəran Dövlət Dram Teatrının gənc aktyorları və aktrisaları ilə "təxmin edilmiş vəziyyətlər"in etüd prosesinin içində "Bədii səhnə obrazı necə yaradılmalı?" texnikasını öyrədəcək.
Bu layihənin ayda beş gün olmaqla, digər bölgə teatrlarında da həyata keçirilməsi nəzərdə tutulub.
Bölmənin digər xəbərləri
