SİYASƏT


Lerikdə Azərbaycanın Milli Qəhrəmanı Valeh Müslümovun xatirəsi ehtiramla yad edilib

Lerik, 3 sentyabr (AZƏRTAC). Lerik şəhərində Azərbaycanın Milli Qəhrəmanı Valeh Müslümovun doğum günü münasibətilə anma mərasimi keçirilib.

AZƏRTAC xəbər verir ki, tədbir iştirakçıları əvvəlcə Milli Qəhrəmanın abidəsi önünə gül dəstələri düzərək xatirəsini ehtiramla yad ediblər.

Mərasimdə Valeh Əlizaid oğlu Müslümovun həyatı və döyüş yolu haqqında məlumat verilib. Bildirilib ki, o, 1968-ci il sentyabrın 2-də Lerik şəhərində anadan olub. 1983-cü ildə Lerik şəhər 2 nömrəli tam orta məktəbinin səkkizinci sinfini bitirərək Sumqayıt şəhərində 17 nömrəli peşə məktəbinə daxil olub. Əmək fəaliyyətinə tikinti trestində başlayıb. 1986–1988-ci illərdə ordu sıralarında xidmət edib.

Valeh Müslümov 1991-ci ilin avqustunda Azərbaycan Respublikası Daxili İşlər Nazirliyinin Xüsusi Təyinatlı Milis Dəstəsində xidmətə başlayıb. O, Şuşa, Xocalı, Tovuz, Füzuli, Qubadlı, Zəngilan və Ağdərə rayonlarının ərazilərində gedən döyüşlərdə iştirak edib.

Qeyd olunub ki, igid döyüşçü 1992-ci il aprelin 8-dən 9-na keçən gecə Ağdərə rayonunun Marquşavan kəndi ərazisində gedən döyüşdə düşmən mühasirəsində qalan döyüşçü yoldaşlarını xilas edərək əsl qəhrəmanlıq nümunəsi göstərib. Düşmənlə qeyri-bərabər döyüşdə yaralanmış 11 nəfər döyüşçü yoldaşını xilas edərək təhlükəsiz zonaya aparıb. Bu zaman aldığı ağır yaradan qəhrəmancasına həlak olub.

Onun igidliyi dövlət tərəfindən yüksək qiymətləndirilib. Azərbaycan Respublikası Prezidentinin 1992-ci il 6 iyun tarixli Fərmanı ilə ilk dəfə “Azərbaycan Milli Qəhrəmanı” adını almış 11 nəfərdən biri də Valeh Müslümov olub.

Valeh Müslümovun təhsil aldığı məktəbə və Lerik şəhərinin küçələrindən birinə onun adı verilib, büstü qoyulub.

2012-ci ildə Valeh Müslümovun şəhid olmasının 20-ci ildönümü ilə əlaqədar onun adını daşıyan məktəbdə qəhrəmanın xatirə muzeyi yaradılıb.

Bu yaxınlarda Əməkdar Jurnalist, Lerik Rayon Ağsaqqallar Şurasının sədri Həmzə Vəliməmmədovun Azərbaycanın Milli Qəhrəmanı Valeh Müslümovun həyatı və döyüş yolundan bəhs edən “Onu Vətən çağırdı” kitabı işıq üzü görüb.

Anma mərasimində Azərbaycan Respublikası Səfərbərlik və Hərbi Xidmətə Çağırış üzrə Dövlət Xidməti Lerik rayon şöbəsinin rəisi, mayor Elməddin Cəfərov, Lerik şəhər 2 nömrəli tam orta məktəbinin müəllimi Hacırza Quliyev, “Qarabağ Müharibəsi Əlilləri, Veteranları və Şəhid Ailələri” İctimai Birliyi Lerik rayon şöbəsinin sədri Veysəl Məlikov, Lerik Rayon Ağsaqqallar Şurasının sədri, Əməkdar Jurnalist Həmzə Vəliməmmədov, “Qarabağ Müharibəsi Əlilləri, Veteranları və Şəhid Ailələri” İctimai Birliyinin Bakı şəhəri Binəqədi rayon şöbəsinin sədri, Valeh Müslümovun döyüş dostu İlham Qayıbov, Lerik Rayon İcra Hakimiyyətinin başçısı Rövşən Bağırov çıxış edərək Milli Qəhrəmanın keçdiyi döyüş yoluna nəzər salıblar, onun ömür yolunun gənclərə nümunə olduğunu diqqətə çatdırıblar.

Qeyd edilib ki, ölkəmizdə şəhid ailələrinə, Qarabağ döyüşlərində əlil olmuş şəxslərə yüksək dövlət qayğı göstərilir, onların sosial-məişət problemlərinin həlli istiqamətində kompleks tədbirlər həyata keçirilir. Hər il onlarla çoxmənzilli binalar, fərdi yaşayış evləri tikilib onların istifadəsinə verilir.

Milli Qəhrəmanın atası Əlizaid Müslümov göstərilən diqqət və qayğıya görə Prezident İlham Əliyevə minnətdarlığını bildirib.

Daha sonra mərasim iştirakçıları Milli Qəhrəmanın adını daşıyan Lerik şəhər 2 nömrəli tam orta məktəbində yaradılmış xatirə muzeyini ziyarət ediblər. Həmzə Vəliməmmədovun Azərbaycanın Milli Qəhrəmanı Valeh Müslümovun həyatından və döyüş yolundan bəhs edən “Onu Vətən çağırdı” kitabının təqdimatı keçirilib.

Tədbir başa çatdıqdan sonra şəhidin məzarı ziyarət olunaraq önünə tər qərənfillər düzülüb, ruhuna dualar oxunub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.