Bakı, 22 yanvar, AZƏRTAC

“Neft Daşları” neft və qazçıxarma idarəsi (NQÇİ) üzrə 2017-ci ildə 1 milyon ton neft hasil olunub.

AZƏRTAC xəbər verir ki, bu barədə SOCAR məlumat yayıb. Bildirilir ki, SOCAR-ın mütəxəssisləri köhnə yataqlarda sadalanan üsulları tətbiq etməklə, ayrı-ayrı yataqlar üzrə hətta hasilat artımına da nail olublar. Belə ki, ötən il “Azneft” İstehsalat Birliyi (İB) üzrə “Abşeronneft” NQÇİ və “Bibiheybətneft” NQÇİ neft hasilatını əvvəlki ilə nisbətən müvafiq surətdə 8,7 faiz və 1,9 faiz artırıb. Neft hasilatının stabil saxlanmasında xüsusi çəkisi olan “Neft Daşları” NQÇİ-də 2017-ci ildə 1 milyon ton neft hasil olunub ki, bu da son onilliklər üçün rekord göstəricidir.

“Azneft” İstehsalat Birliyinin baş direktoru Daşqın İskəndərov yataqlarda hasilatın artımına təsir edən amilləri belə izah edib: “Yalnız “Abşeronneft” NQÇİ-yə aid olan yataqları götürsək, orada son illərdə ümumi hasilat 2,5 dəfədən çox artıb. Üstəlik bu uğurları aşağı maddi məsrəflərlə əldə edə bilmişik. Belə ki, bu gün “Azneft” İB üzrə hasilatın maya dəyəri dünyada ən aşağı sıralardadır, yəni əməliyyatlarımızın səmərəliliyi olduqca yüksəkdir. Şübhəsiz ki, bu da Azərbaycan neftçilərinin məharətinin və əzmkarlığının bəhrəsidir”.