Qubanın Bostankeş kəndi sel təhlükəsi ilə üzləşib
Quba, 15 iyun, Elxan Yusifli, AZƏRTAC
İyunun 15-i axşam saatlarından başlayan güclü leysan yağışı Quba rayonunun Bostankeş kəndində sel təhlükəsi yaradıb.
Kənd sakinləri AZƏRTAC-ın bölgə müxbirinə bildiriblər ki, üç saatdan artıqdır yağan güclü yağış nəticəsində yaranan sel suları Xınalıq inzibati ərazi dairəsinə aid olan Bostankeş kəndinin yollarını və həyətləri basıb. Sel getdikcə gücləndiyindən kəndin aşağı hissəsində yaşayan sakinlər evlərini tərk edərək, daha yüksəkdə yerləşən təhlükəsiz əraziyə çıxıblar.
Sel suları Bostankeşdən Xınalıq kəndinə gedən yolda hərəkəti məhdudlaşdırıb. Həmin yolda avtomobildə çətin vəziyyətdə qalan Xınalıq sakinlərinin köməyinə Qubadakı 5 saylı Yol İstismarı MMC-nin ərazidə xidmətdə olan növbətçi briqadasının əməkdaşları gəliblər. Avtomobili ərazidən çıxarmaq mümkün olmasa da, vətəndaşlar Bostankeş kəndinə gətirilib.
Qeyd edək ki, 2020-ci ildə Bostankeş kəndinə gələn sel yaşayış evlərinə, fərdi təsərrüfatlara və yol infrastrukturuna ciddi ziyan vurmuşdu.
Bölmənin digər xəbərləri
