“XAZART” incəsənət simpoziumuna yekun vurulub
Şabran, 14 oktyabr, AZƏRTAC
Mədəniyyət Nazirliyinin dəstəyi, “Leyla Khazary ArtGallery” və “Qalaalti Hotel & Spa”nın təşkilatçılığı ilə keçirilən “XAZART” incəsənət simpoziumuna oktyabrın 14-də Qalaaltında yekun vurulub.
AZƏRTAC xəbər verir ki, simpoziuma rəssam və incəsənətin müxtəlif sahələrinə aid sənətkarlar qatılıb.
“XAZART” incəsənət simpoziumunun məqsədi ictimaiyyət nümayəndələrinin iştirakı ilə təsviri incəsənətdə müasir tendensiyaları müəyyənləşdirmək, geniş tamaşaçı kütləsi arasında müasir rəngkarlığı təbliğ etməkdir. Simpoziumda hər rəssam daxili dünyasını, öz baxışını auditoriyaya gətirərək, tamaşaçıları öz yaradıcılığı ilə tanış edir.
Simpoziumda Azərbaycanın hüdudlarından kənarda da tanınan və sevilən sənətkarlar, eləcə də ustad rəssamlar Anar Hüseynzadə, Anar Yolçuyev, Diana Əliyeva, Eldar Babazadə, Elnur Mahmudov, Əbülfəz Fərəcoğlu, Fərhad Yalquzaq, İnna Kostina, Mir Azər Abdullayev, Rafail Əliyev, Erkin Ələkbərli, Təranə Seid, Zöhrab Salamzadə təbiətdən ilhamlanaraq öz ideyalarını kətan parça üzərinə köçürüblər.
Tədbirin əhəmiyyətin danışan rəssam Fərhad Yalquzaq deyib: “Simpoziumun rəssamın həyatında əhəmiyyəti böyükdür, çünki burada müxtəlif janrlarda işləyən rəssamlar bir araya gəlir və iş prosesində bir-birlərinin texnikaları ilə tanış olur, nəyisə mənimsəyirlər. Yaradıcılıq baxımından simpoziumun gənclər üçün önəmi daha böyükdür. Onlar peşəkar rəssamların texnikalarını görərək öz işlərindəki boşluqları doldurmağa çalışırlar. Onlar bir rəsmin istər realist, istərsə də abstrakt yaranma mərhələlərini izləyir, hansısa bir obrazın yaranmasına şahidlik edirlər”.
F.Yalquzaq bildirib ki, rəssam heç zaman simpoziumlarda fərdi yaradıcılığını tam olaraq göstərə bilmir, çünki rəssamın özünün mühiti olmalıdır, ancaq rəssam peşəkar olduqda istənilən simpoziumda yaxşı əsər yarada bilər.
Simpoziuma qatılan rəssam Mir Azər Abdullayev Qalaaltına gələrkən artıq nəyi çəkəcəyini bildiyini deyib: Vacib deyil Çıraqqala olsun, hər halda beynimizdə ideya artıq yaranmışdı. Mən rəsmlərimdə çox zaman qlobal, optimist, insanın gələcəyi ilə bağlı mövzulara toxunuram”. Qalaatında olarkən 3 mövzu üzərində işlədiyini deyən rəssam bildirib ki, onlardan biri Qarabağa aid “Başlanğıc” adlanır: “Simpozium zamanı daha sonra qadının cəmiyyətdə rolunu əks etdirən “Missiya” və insanın həyata olan münasibəti, həyatda axtardığı tarazlığı göstərməyə çalışan “Tarazlıq” rəsmlərini çəkdim. Hansısa bir obrazı yaradarkən onu öz üslubuma uyğunlaşdırmağa çalmışam. Məhz bu səbəbdən çəkdim rəsmlərdə pozitiv enerji duyulur”.
Fərdi sərgilərilə bağlı məlumat verən Mir Azər Abdullayev bildirib ki, ötən il Qalaaltında fərdi sərgisi açılıb. Rəssam qeyd edib ki, daha çox xarici ölkələrdəki sərgilərdə iştirak edib. Qeyd edib ki, noyabr ayında, Qələbə Günü ərəfəsində Şuşa ilə bağlı fərdi sərgi açmağa hazırlaşır.
Qeyd edək ki, simpoziumun təşkilatçılarından olan “Leyla Khazary ArtGallery” rəssamların yaradıcılığını təbliği, fərdi sərgilərin təşkili, incəsənət haqqında sənədli filmlər nümayişini həyata keçirir, eləcə də Azərbaycanın incəsənət və qalereya işi sahəsində bir çox yeniliklərin yaradıcısı və təşəbbüskarı kimi çıxış edir. Qalereya rəngkarlığı təbliğ etməkdən əlavə onlayn-şoular, konfranslar və hərraclar, rəsm kursları və mühazirələr də keçirir.
“XAZART” incəsənət simpoziumu bölgələrdə bədii həyatın canlanması, yerli istedadların yaradıcılığa həvəslərinin artırılması, paytaxtla əyalət arasında yaradıcılıq münasibətlərinin təkmilləşdirilməsi məqsədilə keçirilib.
Bölmənin digər xəbərləri
