® “Araz” supermarketlər şəbəkəsi fermerlərin məhsullarını tarladan birbaşa rəflərə çatdırır
Veysəloğlu Şirkətlər Qrupuna (VŞQ) daxil olan “Araz” supermarketlər şəbəkəsinin ən böyük meyvə tədarükçülərindən biri də Elçin Həsrətovdur. Qusar rayonunun Qullar kənd sakini E.Həsrətov 8 ildən çoxdur ki, alma, armud, nektarin, şaftalı, gilas təsərrüfatı ilə məşğuldur.
E.Həsrətov bir müddət xarici ölkədə yaşasa da fermerlərə göstərilən dövlət dəstəyindən xəbər tutub, Azərbaycana qayıdıb və ata-babadan qalan torpaqları əkib becərməyə başlayıb: “Fermerlərə subsidiyaların, güzəştli kreditlərin verilməsi meyvəçiliyin yenidən inkişaf etdirilməsinə şərait yaratdı. Ənənəvi meyvə bağlarımızı Avropa modelinə uyğun intensiv bağlarla əvəzlədik. Əvvəlcə 20 hektar ərazidə meyvə yetişdirməyə başladıq. Sonra əkin sahəsini genişləndirərək ərazini böyütdük və əkilən meyvə növlərini çoxaltdıq”.
Fermerin meyvə bağlarını genişləndirməsinin səbəblərindən biri də məhsulunu yerli bazara rahatlıqla çıxarmaq üçün “Araz” supermarketlər şəbəkəsi ilə əməkdaşlığa başlaması olub. Bu əməkdaşlıq çərçivəsində fermerlər Bakıya məhsul gətirmək üçün vaxt və pul sərf etmir, məhsullar yaxın bölgələrə maksimum 24 saat ərzində çatdırılır: “Artıq bizim təminatımız var ki, yetişdirdiyimiz məhsullar ağacın dibində çürüməyəcək, “Araz” supermarketlər şəbəkəsindən gəlib alacaqlar. Əvvəllər məhsulumuzu xarici bazarlara satırdıq. Məhsul günlərlə yol gedirdi, nəticədə gecikmə, çürümə və xeyli itki ilə üzləşirdik. Maddi və mənəvi zərərlərimiz çox olurdu. Lakin “Araz” supermarketlər şəbəkəsi ilə əməkdaşlıqdan sonra meyvə ağacdan dərilir, elə yerindəcə bizdən alınır və mağazalara yola salınır. Nəticədə zəhmətlə becərdiyimiz məhsullar çürümür, əlavə xərclərimiz olmur”.
Qeyd edək ki, Veysəloğlu Şirkətlər Qrupu və “Araz” supermarketlər şəbəkəsi fermerlərin becərdiyi məhsulları tarladan birbaşa rəflərə gətirməklə həm kiçik və orta təsərrüfat subyektlərinə dəstək göstərir, həm də istehlakçıları mümkün uyğun qiymətə, təzə və təravətli meyvə-tərəvəzlə təmin edir.
Bölmənin digər xəbərləri
