® “Caspian Energy Club” “CPC” MMC-nin zavoduna “Grand CEO Tour” təşkil edib
“Caspian Energy Club”a üzv olan şirkət sahibləri və rəhbərləri Oğuz rayonuna işgüzar səfər çərçivəsində Cənubi Qafqazın nişasta emalı məhsulları istehsalı üzrə ixtisaslaşmış yeganə müəssisəsi olan “CPC” MMC-ni (Corn Processing Company) ziyarət ediblər.
“Grand CEO Tour”a qatılan iştirakçılar zavodun istehsal sahələri ilə tanış olaraq, qarğıdalının emal mərhələlərini, tətbiq olunan müasir texnologiyaları, emal olunmuş məhsulların saxlanması və qablaşdırılması proseslərini, keyfiyyətə nəzarət proseslərini yaxından izləyiblər.
Görüşdə “Grand CEO Tour” iştirakçıları və zavod rəhbərliyi arasında dəyirmi masa formatında müzakirələr keçirilib. Burada yerli və regional bazarlarda nişasta məhsullarına artan tələbat, ixrac potensialının genişləndirilməsi, logistika proseslərinin optimallaşdırılması və yeni bazarlara çıxış imkanları kimi mövzular ətrafında fikir mübadiləsi aparılıb.
Səfər barədə danışan Telman Əliyev bildirib ki, “Grand CEO Tour” iştirakçıları təkcə zavodun istehsal imkanlarını deyil, həm də tətbiq olunan texnologiyaları, innovativ yanaşmaları və keyfiyyətə nəzarət mexanizmlərini yerində görmək imkanı qazanıbar.
“Bu format “Caspian Energy Club” üzvlərinə istehsalat prosesini canlı şəkildə müşahidə etmək, müəssisənin daxili iş ritmini yaxından hiss etmək imkanı yaradır. İştirakçılar istehsalat zəncirinin hər bir mərhələsini yerində izləyir, müəssisənin necə işlədiyini, qərarların necə tənzimləndiyini əyani şəkildə görürlər. Eyni zamanda, “Caspian Energy Club” üzvləri şirkətin yüksəkvəzifəli menecerləri ilə birbaşa ünsiyyət qurmaq imkanı əldə edirlər. Belə görüşlər şübhəsiz ki, gələcək əməkdaşlıqlar və peşəkar əlaqələrin qurulması baxımından xüsusi əhəmiyyət kəsb edir”, - deyə “CPC” MMC-nin direktoru İbrahim Mehdiyev bildirib.
O, həmçinin vurğulayıb ki, zavod təkcə istehsal gücü ilə deyil, həm də beynəlxalq standartlara uyğun fəaliyyəti, ixrac təcrübəsi və yerli bazardakı möhkəm mövqeyi ilə nümunə göstərilə bilər. “Biz əminik ki, “Grand CEO Tour” nəticəsində bir sıra yeni tərəfdaşlıqların əsası qoyulacaq və bu əməkdaşlıqlar həm yerli, həm də beynəlxalq səviyyədə biznes imkanlarının genişlənməsinə töhfə verəcək”, – deyə Telman Əliyev qeyd edib.
Daha sonra “CPC” MMC-nin direktoru İbrahim Mehdiyevə təşəkkürnamə sertifikatı təqdim edilib.
Tədbir sonda iştirakçılar üçün təşkil olunan qeyri-rəsmi çay görüşü ilə davam edib.
Görüşdə “CPC” MMC-nin rəhbər heyəti və özəl sektor nümayəndələri aktual mövzular ətrafında fikir mübadiləsi aparıblar. Görüş zamanı şirkətlər arasında qarşılıqlı maraq doğuran istiqamətlər üzrə əməkdaşlıq və birgə fəaliyyət imkanları da geniş müzakirə olunub. “CPC” MMC Cənubi Qafqazda qarğıdalı emalı və nişasta əsaslı məhsulların istehsalı ilə məşğul olan yeganə müəssisədir. Zavod Azərbaycanın Oğuz rayonunda yerləşir və qarğıdalı emalı üçün çevik, sürətli və səmərəli texnoloji həllər təklif edən peşəkar avadanlıqlara malikdir. Zavod ildə 30 min tona qədər qarğıdalı emal etmək gücünə malikdir.
“Caspian Energy Holding” haqqında qısa məlumat:
“Caspian Energy Holding” 2025-ci ildə “Caspian Energy” brendi altında fəaliyyət göstərən bütün “networking” platformalar, media layihələr, forumlar və mükafatları vahid "Milli.Biz" ekosistemi daxilində birləşdirmək məqsədilə təsis edilib. "Milli.Biz" ekosistemi əsasında “Caspian Energy Club”, Avropa ilə İqtisadi Əməkdaşlıq İctimai Birliyi və Azərbaycan Milli Biznes Assosiasiyası vasitəsilə 100-dən çox ölkədən olan sahibkarlara “networking” qurmaq imkanı yaradılacaq. “Caspian Energy Holding”in tərkibinə aşağıdakı qruplar daxildir: “Caspian Energy Club”, “Caspian Energy Club International”, “Caspian Energy EXIFOR Group”, “Caspian Energy International Media Group”, “Award Organizers Group”, “Caspian Energy Research Group”, “Caspian Energy Entertainment Group”, “Caspian Energy Jobs Group”. “Caspian Energy Club”a daxil olan sahibkarlar vahid "Milli.Biz" ekosistemi çərçivəsində hal-hazırda mövcud olan bütün xidmətlərlə yanaşı, hüquq, maliyyə, turizm, konsaltinq və digər xidmətlərdən yararlana biləcəklər. "Milli.Biz" ekosisteminə inteqrasiya olunan qlobal loyallıq proqramı da tətbiq ediləcək. 2002-ci ildə dünyanın iri transmilli, dövlət və özəl neft-qaz və enerji şirkətləri tərəfindən yaradılan, mənzil-qərargahı Bakıda yerləşən “Caspian Energy Club” dünyanın 50 ölkəsindən 5000-dən çox şirkəti birləşdirən və dinamik inkişaf edən beynəlxalq biznes networking platformasıdır.
“Caspian Energy Club” biznes-hökumət dialoqunun fəal iştirakçısıdır və əsas məqsədlərindən biri, Azərbaycanda və “Caspian Energy Club”ın fəaliyyət göstərdiyi digər ölkələrdə investisiya və işgüzar mühitin yaxşılaşdırılmasıdır. “Caspian Energy Club International” 2023-cü ildə “Caspian Energy Club”ın beynəlxalq layihələrini və dünyanın 63 şəhərində fəaliyyət göstərən xarici ofisləri vahid standartlar əsasında idarə etmək məqsədilə yaradılıb. Bu strukturun nəzdində idarə olunan və yaxın 7 il ərzində dünyanın 100 ölkəsində nümayəndəlik açılması planlaşdırılan Azərbaycan Milli Biznes Assosiasiyası (MİLLİ.BİZ) – ölkə daxilində və ölkə hüdudlarından kənarda Azərbaycan sahibkarlarını birləşdirən, regionlarda istehsal olunan məhsul və xidmətləri beynəlxalq bazarlara çıxaran, həmçinin regionlara beynəlxalq investisiyaların cəlb edilməsində aktiv rol oynayan vahid işgüzar platformadır.
Bölmənin digər xəbərləri
