® “Qarabağdan Silikon Vadisinə” adlı yeni startup proqramı elan olunur
ABŞ-də fəaliyyət göstərən azərbaycanlı sahibkar Fərid İsmayılzadənin təsis etdiyi “Technovate” şirkəti tərəfindən Azərbaycanın innovasiya ekosisteminə töhfə vermək məqsədilə “Qarabağdan Silikon Vadisinə” adlı strateji startup proqramı elan olunur. Layihənin əsas məqsədi ölkəmizin istedadlı mütəxəssislərini qlobal bazarda rəqabətədavamlı startap qurucularına çevirmək, Qarabağı regional innovasiya və texnologiya mərkəzi kimi mövqeləndirməkdir.
Proqram çərçivəsində bankçılıq, telekommunikasiya, enerji, texnologiya və dövlət sektorlarında çalışan, sahibkarlığa marağı olan, minimum 3 il iş təcrübəsinə və ingilis dili biliyinə malik peşəkarlar seçiləcək. İştirakçılar Silikon Vadisində yaşayan texnoloji diaspora nümayəndələri və beynəlxalq ekspertlərin iştirakı ilə keçiriləcək 4 aylıq intensiv onlayn təlim proqramına qatılacaq, komandalar formalaşdıracaq və praktik startup quruculuğu mərhələsindən keçəcəklər.
Proqramın yekunu olaraq Qarabağda keçiriləcək “Demo Day” tədbirində seçilmiş ideyalara “Technovate” tərəfindən 50 min ABŞ dollarınadək ilkin investisiya və mentorluq dəstəyi təqdim olunacaq.
Layihə barədə danışan Fərid İsmayılzadə bildirib: “Bu proqramın əsas fərqi ondan ibarətdir ki, biz artıq real iş təcrübəsi olan və komfort zonasından çıxaraq risk etməyə hazır peşəkarlarla işləyəcəyik. Dünya təcrübəsi göstərir ki, ən uğurlu startap qurucularının yaşı adətən 35–45 aralığında olur. Yəni bu sahə yalnız yeni məzunların deyil, təcrübəli mütəxəssislərin də meydanıdır. Biz bu kateqoriyadan olan insanların uğur qazanması üçün xüsusi hazırlanmış, praktikyönümlü kurikulum təqdim edirik. Məqsədimiz ölkəmizdən istər hardware, istərsə də software sahəsində qlobal bazarda rəqabət apara biləcək startap tapmaq və onu sistemli şəkildə yetişdirməkdir. Ən azı yüzlərlə azərbaycanlıya Silikon Vadisi düşüncə tərzini aşılamaq belə bizim üçün böyük nəticə olacaq. Hesab edirəm ki, bu təşəbbüs son dövrlər ABŞ ilə Azərbaycan arasında inkişaf edən münasibətlər fonunda da praktik və strateji əhəmiyyət daşıyır”.
Yüksək sosial-iqtisadi dəyər yaratmağı hədəfləyən proqramdan əldə olunacaq gəlirin bir hissəsi Qarabağda elm və innovasiya mühitinin gücləndirilməsinə, sahibkarlıq mədəniyyətinin inkişafına yönəldiləcək. Təşəbbüs uzunmüddətli iqtisadi dinamika yaratmaqla yanaşı, regionun davamlı və texnologiya əsaslı inkişafını dəstəkləməyi qarşısına məqsəd qoyur.
Bütün özəl və dövlət qurumları layihəyə tərəfdaş kimi qoşulmağa dəvət olunur. Tərəfdaş qurumlar milli və beynəlxalq səviyyədə innovasiya tərəfdaşı kimi mövqelənmək, əməkdaşlarının sahibkarlıq və innovasiya bacarıqlarını inkişaf etdirmək, həmçinin Qarabağın innovasiya mərkəzi kimi formalaşmasında strateji rol almaq imkanı qazanacaqlar.
Əməkdaşlıq imkanlarını müzakirə etmək və layihə haqqında ətraflı məlumat almaq üçün fevralın 25-i saat 10:00-da keçiriləcək ödənişsiz onlayn məlumat sessiyasında iştirak etmək mümkündür. Qeydiyyat: www.qarabag2silicon.com
Qeyd edək ki, layihənin təşəbbüskarı Azərbaycanda təsis etdiyi “GoldenPay” və ölkənin ilk onlayn ödəniş portalı “hesab.az” layihələrinin satışından sonra ABŞ-də “Technovate” şirkətini quran azərbaycanlı sahibkar Fərid İsmayılzadədir. “Technovate” ABŞ-də “venture studio” modelinə əsaslanan innovasiya platformasıdır və hazırda həm Azərbaycandan həm də region ölkələrindən qlobal potensiala malik innovativ ideyaların startapa çevrilməsini və onların beynəlxalq bazarlara çıxarılmasını dəstəkləyir. Studiyanın inkubasiya etdiyi 5 startap artıq ABŞ bazarında fəaliyyət göstərir və hər biri milyonlarla dollar dəyərində qiymətləndirilir.
Bölmənin digər xəbərləri
