"Zirə"nin futbolçusu: Qol imkanlarından istifadə edə bilməməyimiz nəticəyə təsir etdi
Bakı, 3 iyun, AZƏRTAC
“Qarabağ” bizdən bir top artıq vurdu və qalib gəldi. Rəqibi qələbə münasibətilə təbrik edirəm”.
Bu sözləri AZƏRTAC-a açıqlamasında “Zirə” komandasının futbolçusu Eldar Quliyev Azərbaycan Kubokunun finalında “Qarabağ”a 1:2 hesabı ilə məğlub olduqları oyun barədə danışarkən deyib.
Ukraynalı yarımmüdafiəçi uduzmaqlarına baxmayaraq, yaxşı mübarizə apardıqlarını bildirib: “Birinci hissədə müdafiədən oynayırdıq. “Qarabağ”ın cinahda oynayan futbolçuları yaxşı oyun nümayiş etdirirdilər. Onların səviyyəsi hamıya bəllidir. Qol imkanlarımız çox olsa da, təəssüf ki, bunu dəyərləndirə bilmədik. Bu da nəticəyə təsir etdi. Rəqib isə əlinə düşən iki fürsəti qola çevirdi və meydanı qələbə ilə tərk etdi. Amma ruhdan düşmək olmaz. Önümüzə baxacağıq”.
22 yaşlı oyunçu gələcək karyerası barədə də danışıb: “Düzdür, əsas heyətdə tam oynaya bilməsəm də, “Zirə” ilə ikiillik müqaviləm var. Gələcəklə bağlı indidən danışmaq tezdir. Fikrimcə, bunu düşünmək üçün hələ zamanım var”.
Qeyd edək ki, “Qarabağ” finalda “Zirə”ni üstələyərək tarixində 8-ci dəfə Azərbaycan Kubokunun qalibi olub.
Bölmənin digər xəbərləri
