ABDULLAH GÜL: TÜRKİYƏ KRIMA UKRAYNANIN VƏ REGİONUN SABİTLİYİNİN MÖHKƏMLƏNMƏSİ MƏQSƏDİ İLƏ KÖMƏK EDİR

31.07.2004 [21:03]
Çap et
A⁺ A^-

Türkiyə Krım tatarlarını Ukraynanın sədaqətli vətəndaşları və iki ölkə arasında dostluğa öz töhfəsini verən birlik hesab edir. AZƏRTAC-ın Kiyevdən aldığı xəbərə görə, bunu Türkiyə Baş nazirinin müavini və xarici işlər naziri Abdullah Gül Ukraynanın “Zerkalo nedeli” qəzetinə müsahibəsində bildirmişdir.

Türkiyə xarici siyasət idarəsinin başçısı demişdir: “Biz Ukraynanın dövlət orqanları və Krım Muxtar Respublikasının rəhbərliyi ilə əməkdaşlıq edərək, Krım tatarlarının təhsil, din və mənzil sahəsində tələbatının ödənilməsinə çalışırıq”.

Onun sözlərinə görə, Türkiyənin Krımda həyata keçirdiyi mənzil layihəsi çərçivəsində 400-dək ailə mənzillə pulsuz təmin edilmiş və bu mənzillər onların mülkiyyətinə verilmişdir. Layihə davam etdirilir. Krım tatarlarının yerbəyer edilməsinə ayrılan yardımın məbləği 4 milyon dollara çatmışdır.

Türkiyə Krım tatarlarına təhsil sahəsində də kömək edir. 2003/2004-cü dərs ilində Krım tatarlarından 45 tələbəyə təqaüd ayrılmışdır.

Abdullah Gül demişdir: “Biz Krıma Ukraynanın və regionun sabitliyinin möhkəmlənməsi məqsədi ilə kömək edirik”.