ABŞ Demokratik Partiyası vitse-prezident postuna namizədini təsdiq edib
Bakı, 20 avqust, AZƏRTAC
Kaliforniya ştatının senatoru Kamala Harrisin Demokratik Partiya sıralarından ABŞ-ın vitse-prezidenti postuna namizədliyi rəsmən təsdiq edilib.
AZƏRTAC xarici KİV-lərə istinadla xəbər verir ki, bu barədə qərar Viskonsin ştatının Miluoki şəhərində virtual şəkildə keçirilən partiya qurultayında elan olunub.
Kamala Harris bu posta namizədliyi irəli sürülən ilk Afrika əsilli amerikalıdır. O, seçkilərdə ali dövlət postuna demokratların namizədi Cozef Baydenlə birlikdə iştirak edəcək.
Harris qurultayda çıxış edərkən ölkədə Afrika və Latın Amerika əsilli vətəndaşların, həmçinin aborigenlərin koronavirusdan yüksək ölüm hallarına səbəb olan struktur irqçilik problemi barədə danışıb. Onun sözlərinə görə, irqçilik təhsil, səhiyyə sahələrində, ev, iş və nəqliyyat təminatında, həmçinin polisin həddən artıq güc tətbiqində özünü göstərir.
Xatırladaq ki, bir müddət öncə Kamala Harris ABŞ prezidenti postuna namizədliyini irəli sürmüş, lakin praymerizlərdə uğurlu nəticələr əldə edə bilməmişdi.
77 yaşlı Cozef Baydenin prezident seçiləcəyi təqdirdə, 55 yaşlı Kamala Harris partiya lideri roluna iddia edəcək.
Qeyd edək ki, ABŞ-da 59-cu prezident seçkiləri noyabr ayının 3-nə planlaşdırılıb. Bu seçkilərdə ali dövlət postu uğrunda respublikaçıların namizədi ABŞ-ın hazırkı Prezidenti Donald Tramp olacaq.
Bölmənin digər xəbərləri
