ABŞ ilə ticarət müharibəsi Aİ-yə 1,1 trilyon avroya başa gələcək
Bakı, 17 aprel, AZƏRTAC
ABŞ ilə tarif müharibəsi 2025-2028-ci illər ərzində Almaniyaya 290 milyard avroya (illik ÜDM-in 1,6 faizi) başa gələcək. Bütün Avropa İttifaqı (Aİ) üçün xərclər isə 1,1 trilyon avro təşkil edəcək. Hazırda tərəflər ticarət siyasəti ilə bağlı danışıqlar aparır.
AZƏRTAC xəbər verir ki, bu rəqəmləri Amerika Prezidenti Donald Trampın gömrük siyasətinin nəticələrini təhlil edən Almaniya İqtisadiyyat İnstitutu (IW) verib. O qeyd edir ki, inkişaf etməkdə olan ölkələr və inkişaf etməkdə olan bazar iqtisadiyyatları Trampın tarif siyasətindən daha çox əziyyət çəkəcək, bəziləri isə “artım nisbətlərində dramatik itkilərə məruz qalacaq”.
Martın 12-də Birləşmiş Ştatlar Aİ-dən idxal edilən 25 milyard avro dəyərində polad və alüminiuma 25 faizlik gömrük rüsumları tətbiq edib. Brüssel ABŞ-dan idxala 22 milyard avro dəyərində cavab rüsumları hazırlayıb və bu vergilər iki mərhələdə - 15 aprel və 15 may tarixlərində qüvvəyə minməli idi.
Aprelin 2-də Tramp 200-dən çox ölkəyə “güzgü” tariflərinin tətbiq ediləcəyini açıqlayıb. Aİ üçün bu nisbət 20 faiz idi. Tədbirin qüvvəyə minməli olduğu aprelin 9-da ABŞ Prezidenti 90 günlük fasilə elan etdi və bu müddət ərzində 10 faizlik baza dərəcəsi tətbiq ediləcək. Brüssel də cavab tədbirlərinin tətbiqini müvafiq şəkildə təxirə salıb.
Brüssel və Vaşinqton ticarət siyasəti ilə bağlı danışıqlar aparır. Xüsusilə, Avropa İttifaqı ABŞ-dan LNG alışını artırmağı, həmçinin bu ölkədən silah almaq və Avropanın yenidən silahlanması üçün maliyyə alətini genişləndirmək imkanlarını nəzərdən keçirir. Bu barədə “Corriere della Sera” nəşri yazır.
Bölmənin digər xəbərləri
