ABŞ-ın nüfuzlu radiosunda Azərbaycan-ABŞ strateji əməkdaşlığı məsələləri müzakirə olunub
Vaşinqton, 19 mart, AZƏRTAC
ABŞ-da nüfuzlu və geniş auditoriyaya malik olan Con Batçelor Şou radio verilişində canlı yayımda Azərbaycanın Birləşmiş Ştatlardakı səfiri Elin Süleymanovdan müsahibə alınıb.
Müsahibə zamanı müxbir Xəzər dənizi regionunda güclü dövlət olan Azərbaycanın hazırda münaqişədən əziyyət çəkdiyini bildirib, Azərbaycanı Birləşmiş Ştatlar üçün regionda mövcud olan xəzinə kimi qiymətləndirib. O, Azərbaycanın dost və tolerant ölkə olduğunu qeyd edib. Azərbaycanın Buş və Obama administrasiyaları ilə yaxşı münasibətlərinin qurulduğunu və bu münasibətlərin hazırda Tramp administrasiyası ilə davam etdirildiyini amerikalı dinləyicilərə xatırladan müxbir Azərbaycanın demokratik müsəlman ölkəsi olduğunu vurğulayıb. Son günlərdə nüfuzlu “Washington Times” qəzetində Azərbaycanın 11 sentyabr terror hadisələrindən sonra ABŞ-a yardım edən ilk ölkələr arasında olmasına dair məqaləyə toxunan aparıcı həmin yazının müəllifi Ceyms Laysonsun dəyərli təhlilini Yaxın Şərqdəki dolaşıq vəziyyət fonunda Azərbaycanın bu gərginlikdən kənarda qalmasına işarə edərək təqdir edib.
Aparıcı Obama administrasiyasından Tramp administrasiyasına keçid dövründə Azərbaycan-ABŞ münasibətlərinin cari vəziyyətinə dair səfir Elin Süleymanova sual verib.
Azərbaycanın ABŞ ilə strateji tərəfdaşlığa sadiqliyinin vurğulandığı məqalədə doğurdan da maraqlı məqamlara toxunulduğunu bildirən səfir E.Süleymanov Azərbaycanın 11 sentyabr terror hadisəsinin törədilməsindən bir neçə saat sonra ABŞ-a terrorla mübarizədə təmənnasız yardımını təklif etdiyini vurğulayıb. O, baş verən çoxsaylı hadisələr fonunda bu günə qədər yaranmış və gələcəkdə də inkişaf etdirilməsinə ehtiyac olan strateji tərəfdaşlığın vacibliyini diqqətə çatdırıb. Ümumilikdə, ABŞ-la və hazırda Tramp administrasiyası ilə münasibətləri müsbət qiymətləndirən diplomat bu münasibətlərin daha da inkişaf etdiriləcəyinə əminliyini ifadə edib və iki ölkə arasında bir çox sahələr üzərində iş getdiyini vurğulayıb. Azərbaycanın Dağlıq Qarabağ regionunda yaradılmış separatçı rejimin “başçısının” qeyri-qanuni yolla əldə edilmiş viza vasitəsilə son günlərdə Vaşinqtona gəlməsi və onun Konqresin inzibati binasında erməni lobbisinin təşkil etdiyi tədbirdə iştirakına toxunan səfir bu məqamın ABŞ-ın strateji maraqlarını sarsıtdığını bildirib. Diplomat iki ölkə arasında olan strateji tərəfdaşlığın vacibliyinin adekvat qiymətləndirilməsinə ümidini ifadə edib.
Azərbaycanın strateji əhəmiyyətini vurğulayan müxbir 2017-ci ildə ölkəmizə səfəri zamanı “İpək Yolu” layihəsinin dəmir yolu versiyası barədə bir çox məlumatlar eşitdiyinə toxunub. Azərbaycanda dəmir yollarının mövcudluğunu, Şimal-Cənub marşrutunun olduğunu və perspektivdə Şərq-Qərb marşrutunun olacağını qeyd edən jurnalist “İpək Yolu” layihəsinin bundan sonrakı inkişaf dinamikası barədə sual verib.
Səfir E.Süleymanov İpək Yolunun ayrılmaz hissəsi olan Bakı-Tbilisi-Qars dəmir yolu layihəsinin regional və qlobal əhəmiyyətini qeyd edərək, onun 2017-ci il oktyabrın 30-da açılışının keçirildiyini diqqətə çatdırıb. ATƏT çərçivəsində təsis edilmiş İpək Yolu Qrupunun bir neçə gün öncə Bakıda görüşünün keçirilməsini xatırladan diplomat həmin görüşdə Azərbaycanın tranzit rolunun yalnız bölgə üçün deyil, qlobal əhəmiyyəti və təsirinin müzakirə olunduğunu bildirib. Səfir bunun Asiya və Avropa arasında çox vacib bağlantı olduğunu diqqətə çatdırıb, İpək Yolunun tarixi və mədəni köklərə bağlılığı ilə yanaşı, bu layihənin Azərbaycan, Gürcüstan, Qazaxıstan, Türkiyə və digər dövlətlər arasında strateji əməkdaşlıq münasibətlərinə əsaslandığını qeyd edib. O, bölgədə bu tipli inteqrasiya layihələrinin vacibliyini və ABŞ-ın bu layihələri dəstəkləməsinin əhəmiyyətini vurğulayıb.
Daha sonra müxbir Cənubi Qafqazın Xəzər dənizi ilə Qara dəniz arasında körpü roluna istinad edərək, bu bölgədə dəyişikliklər üçün maliyyə resurslarının vacibliyinə və müəyyən əleyhdarların olduğuna işarə edərək dəmir yolu layihələrinin gerçəkləşməsində hər bir tərəfin maraqlı olub-olmadığı barədə sual ünvanlayıb. Səfir sualın cavabında bildirib ki, maliyyə resurslarının əhəmiyyətli olmasına baxmayaraq, inkişaf edən və çiçəklənən bölgə üçün əməkdaşlıq çox vacibdir.
Qeyd edək ki, Con Batçelor Şou gündəlik həyatda aktual olan beynəlxalq hərbi, siyasi və iqtisadi mövzulara həsr olunur. ABŞ-da federal ABC Radio Şəbəkəsinə daxil olan müxtəlif ştat və şəhərlərdə geniş çeşidli radio kanallar tərəfindən həm canlı, həm də audioyazısı yayımlanır. Həftənin hər günü yayımlanan bu şou ABŞ-da milyonlarla dinləyici auditoriyasına malikdir.
Yusif Babanlı
AZƏRTAC-ın xüsusi müxbiri
Vaşinqton
Bölmənin digər xəbərləri
