ABŞ-ın Pensilvaniya ştatında Azərbaycan Günü elan olunub
Vaşinqton, 11 may. AZƏRTAC
ABŞ-ın Pensilvaniya ştatının qubernatoru Tom Vulf Azərbaycan Xalq Cümhuriyyətinin 100-cü ildönümü ilə əlaqədar olaraq təbrik məktubu imzalayıb.
AZƏRTAC-ın məlumatına görə, məktubda qeyd olunur ki, 1918-ci il mayın 28-də müsəlman Şərqində ilk dünyəvi parlamentli respublika olan Azərbaycan Xalq Cümhuriyyəti qurulub və dünyanın digər demokratik dövlətləri, o cümlədən ABŞ tərəfindən tanınıb. Müstəqillik dövründən bəri Azərbaycan regionun mayakı olaraq irqi, cinsi və ya etnik mənsubiyyətindən asılı olmayaraq hamı üçün bərabərlik hüququnu tanımış və Qafqaz regionunda ABŞ-ın müttəfiqi və strateji tərəfdaşıdır.
T.Vulf Azərbaycan Xalq Cümhuriyyətinin yaranmasının 100 illiyinin qeyd olunması ilə əlaqədar ölkədə yaşayan azərbaycanlıları cəmiyyətə verdikləri töhfələri qürur hissi ilə qeyd etməyə çağırır.
Qubernator Pensilvaniyada yaşayan vətəndaşlar adından Xalq Cümhuriyyətinin 100 illiyini tanımaqdan qürur duyduğunu, bunun yaddaqalan və uğurlu qeyd olunması üçün ən xoş arzularını bildirib.
Yusif Babanlı
AZƏRTAC-ın xüsusi müxbiri
Vaşinqton
Bölmənin digər xəbərləri
