ABŞ İRAQDAKI HƏRBİ QÜVVƏLƏRİNİ 15 MİN NƏFƏR AZALDIR
AZƏRTAC-ın xüsusi müxbiri xəbər verir ki, ABŞ müdafiə nazirinin müavini Pol Volfoviçin açıqlamasına görə, ötən bazar günü İraqda keçirilən seçkilər zamanı zorakılıq hallarının nisbətən az olması Pentaqona bu ölkədəki ABŞ qüvvələrinin sayını 15 min nəfər azaltmağa əsas verir. Ona görə ABŞ seçkilərdə təhlükəsizliyi təmin etmək üçün İraqa göndərilmiş quru qoşunları və dəniz piyadalarından ibarət əlavə üç briqada və hərbi hava qüvvələrinin 1500 nəfər təmsilçisini geri çağıraraq, orada 135 min nəfər hərbçi saxlayacaqdır. Bununla yanaşı, Senatın Hərbi xidmətlər komitəsində çıxış edən Volfoviç bildirmişdir ki, bu il İraqdan əlavə qoşun çıxarılması gözlənilmir və yerli yaraqlılara qalib gəlmək üçün “qarşıda çətin yol durur”.
“Vaşinqton Post” qəzetinin yazdığına görə, ABŞ qüvvələrinin İraqdan nə vaxt çıxarılacağı məsələsi gərgin müzakirələrə səbəb olmuşdur. Prezident Buş və onun hökumətinin üzvləri konkret tarix göstərməkdən çəkinərək vurğulayırlar ki, bu, İraq qüvvələrinin hazırlıq keçərək, təhlükəsizliyi öz üzərinə götürəcəklərindən asılı olacaqdır. Hazırda yerli qüvvələrin üçdə bir hissəsi belə bu tapşırığın öhdəsindən gələ bilmir.
Bölmənin digər xəbərləri
