ABŞ maliyyə institutları ilə əməkdaşlığın genişləndirilməsi müzakirə olunub
Bakı, 29 aprel, AZƏRTAC
Mərkəzi Bank sədrinin birinci müavini Əliyar Məmmədyarovun rəhbərlik etdiyi nümayəndə heyətinin ABŞ səfəri çərçivəsində “J.P. Morgan Chase” bankın İdarə Heyətinin sədrinin müavini Daniel Zelikov ilə görüşü keçirilib.
Mərkəzi Bankdan AZƏRTAC-a bildirilib ki, səfər çərçivəsində “Citi Group” şirkətinin Avropa, Yaxın Şərq və Şimali Afrika regionu üzrə ictimai sektorunun rəhbəri və idarəedici direktoru Georgiy Yordanovun rəhbərlik etdiyi nümayəndə heyəti ilə görüş olub.
Bu görüşlərdə Azərbaycanda makroiqtisadi və maliyyə sabitliyi üzrə cari vəziyyət, qurumlar arasında tərəfdaşlıq imkanları, həmçinin hər iki ölkənin maliyyə institutları arasında əməkdaşlığın genişləndirilməsi perspektivləri müzakirə olunub.
Yaz toplantıları çərçivəsində Mərkəzi Bankın nümayəndə heyətinin sonuncu görüşü “Clearstream” şirkətinin Qlobal bazarlar üzrə məhsul idarəetməsinin rəhbəri Jan Vilyems və Təminat, kredit və likvidlik həlləri üzrə vitse-prezidenti Kristian Rosler ilə baş tutub. Görüşdə təşkilatlar arasında potensial ikitərəfli əlaqələr və gündəlikdə olan mühüm təşəbbüslər ətrafında fikir mübadiləsi aparılıb.
Bölmənin digər xəbərləri
