ABŞ SƏFİRLİYİNİN İCTİMAİ ƏLAQƏLƏR ŞÖBƏSİNİN RƏHBƏRİNİN AZƏRBAYCANDA MİSSİYASI BAŞA ÇATIR
Amerika Birləşmiş Ştatlarının Azərbaycandakı səfiri Ann Ders səfirliyin ictimai əlaqələr şöbəsinin rəhbəri Conatan Henikin diplomatik missiyasının başa çatması münasibətilə öz iqamətgahında qəbul təşkil etmişdir.
Qəbulda çıxış edən səfir demişdir: “Conatan Henik Azərbaycanda üç illik uğurlu fəaliyyəti dövründə bu ölkədə müstəqil jurnalistikanın və söz azadlığının möhkəmlənməsi işinə böyük töhfə vermiş, buna görə Amerika İctimai Əlaqələr Assosiasiyası tərəfindən mükafatlandırılmışdir”.
Səfir demişdir ki, bu mükafat həm də ona görə xüsusi əhəmiyyət kəsb edir ki, Conatan Henikin Bakıdakı işi onun ictimai əlaqələr sahəsində mütəxəssis kimi ilk təyinatıdır. Ann Ders vurğulamışdır ki, Conatan Henik azərbaycanlı jurnalistlərlə sıx peşəkar əlaqələr və şəxsi münasibətlər yaratmağa müvəffəq olmuşdur.
Səfir qeyd etmişdir ki, Conatan Henik Azərbaycanda işini başa çatdırandan sonra ABŞ-ın Şərqi Timordakı diplomatik missiyasının rəhbərinin müavini təyin ediləcəkdir.
Conatan Henik çıxış edərək demişdir: “Azərbaycanda müstəqil mətbuatın müdafiəçisi və medianın inkişafı üzrə proqramların rəhbəri olmağım mənim üçün böyük şərəf idi”. O qeyd etmişdir ki, bu iş həm çətin, həm də məsuliyyətli idi.
Amerikalı diplomat demişdir ki, Azərbaycanda peşəkar və müstəqil mətbuat demokratiyanın möhkəmlənməsinin ən yaxşı təminatıdır.
######
Bölmənin digər xəbərləri
