Adil Əliyev: Kanadanın Cənubi Qafqazda sülhə maneə olmaq cəhdləri əbəsdir
Bakı, 29 oktyabr, AZƏRTAC
Azərbaycanın dünyada sülhü dəstəkləməsinə, beynəlxalq hüququn hamılıqla qəbul edilmiş norma və prinsiplərini rəhbər tutaraq atdığı addımlara təəssüf ki, qısqanclıqla yanaşan ölkələr var. Ölkəmizin ərazi bütövlüyünün pozulmasına və torpaqlarımızın işğalda qalmasına 30 il ərzində susmuş dövlətlərin bu gün irəli sürdükləri ittihamlar əsassızdır.
Təəssüf ki, Ermənistan tərəfindən torpaqlarımızın işğalını pisləyən, erməni qoşunlarının Azərbaycan ərazisindən dərhal və qeyd-şərtsiz çıxarılmasını tələb edən Birləşmiş Millətlər Təşkilatının Təhlükəsizlik Şurasının 4 və Baş Assambleyanın 1 qətnaməsi bu 30 il ərzində yalnız kağız üzərində qaldı. Qəbul olunmuş qətnamələrin icrası ilə bağlı Ermənistana nəinki təzyiq, heç beynəlxalq səviyyədə ictimai qınağa da məruz qalmadı. Azərbaycan ərazi bütövlüyünü bərpa, suverenliyini bərqərar etməklə həm də beynəlxalq hüququn normalarını yerinə yetirdi.
Vaxtilə sakit dayanmış və Ermənistanın təcavüzünə göz yuman dövlətlərin bu gün qərəzli bəyanatları və atdığı addımlar bu ölkələrin ermənipərəst siyasətini dünyaya nümayiş etdirir. Ermənistanın rəhbərliyinin uzun illər Cənubi Qafqazda sülhün qarşısındakı yeganə əngəl olması beynəlxalq ictimaiyyətə yaxşı məlumdur, hər zaman Azərbaycanın münaqişənin danışıqları masasında pozanda məhz Ermənistan olub. Sülh təklif ediləndə yeni ərazi iddiaları ilə çıxış edən yenə bu dövlətin baş naziri və digər vəzifəli şəxsləri olub. Lakin bu gün artıq münaqişə tarixdə qalsa da, hələ də Qafqazda sabitliyi qəbul edə bilməyən dövlətlərin olmasının şahidiyik.
AZƏRTAC xəbər verir ki, bu fikirləri Milli Məclis sədrinin müavini Adil Əliyev söyləyib.
A.Əliyev bildirib ki, Fransa kimi ermənipərəst mövqedə dayanan Kanadanın xarici işlər naziri Melani Colinin Ermənistana səfəri və bu ölkədə verdiyi açıqlamalar ciddilikdən kifayət qədər uzaqdır, əsassızdır, heç bir halda qəbul edilə bilməz. Tarixən Fransanın müstəmləkəsi olan bir dövlətin fransızların neokolonial siyasətinə qarşı qətiyyətli mövqe tutan Azərbaycana qarşı bu cür iddialarla çıxış etməsi gözlənilən idi. Bugünkü açıqlamanın əsas səbəblərindən biri də təbii ki, Amerika Birləşmiş Ştatlarıdır. Kanadaya verilmiş tapşırıqların yalnız bir məqsədi var - Cənubi Qafqazda heç bir vəchlə sülh olmasın.
Özünü ABŞ-ın ştatlarından biri hesab edən və çıxışlarını Vaşinqtondan gələn tapşırıqlar üzərində quran Kanada XİN başçısının səriştəsizliyi qəbuledilməzdir. Eyni zamanda, özbaşına Ermənistanla şərti sərhədə gələn, ölkəmizin ərazilərini müşahidə edən xanım nazirin hərəkətləri Diplomatik xidmətlərlə bağlı Vyana Konvensiyasının tələblərinə də tam ziddir.
“Lakin bu, Kanada üçün ilk belə hal deyil. Məhz bu dövlət hər zaman beynəlxalq hüququn prinsiplərini pozmaqla tanınıb. Azsaylı xalqların hüquqlarının tanınmaması üçün bütün gücünü ortaya qoymuş və bu sahədəki beynəlxalq sənədə qarşı çıxmış dövlətdən hər şeyi gözləmək olardı.
Əsas sual budur ki, ABŞ, Kanada sülhün tərəfində idilərsə, bu illər ərzində hansı səbəbdən Ermənistanın təcavüzünə göz yumurdular?!
Birincisi, Kanada iqtisadiyyatı pandemiyadan sonra heç cür bərpa ola bilməyib. Hökumət xalqın tələblərinə cavab vermir, ölkədə olan hakimiyyət böhranını idarə etmək əvəzinə, ermənipərəst siyasət yürütməklə xalqının diqqətini tam başqa istiqamətə, onlara aid olmayan bir məsələyə yönəldir. Nəticədə xaosu ölkəsindən xaricə ixrac etmiş olur.
İkincisi, Kanada və Ermənistanın siyasi xəttinin əsas cizgiləri ksenofobiyadır, islamofobiyadır. Təbii ki, Ermənistan monoetnik dövlətdir və bu dövlətin ərazisində erməni xalqından başqa heç kəs yaşamır. Kanada isə BMT-də azsaylı xalqların hüquqlarının tanınması ilə əlaqədar beynəlxalq sənədin əleyhinə səs verib. Etdikləri yanlışlıqlardan nəticə çıxarıb Azərbaycanın multikulturalizm, tolerantlıq kimi ənənələrini öyrənmək, tətbiq etmək əvəzinə, bacardıqca bu səhvlərinin arxasında dururlar. Kanada azsaylı xalqları dissimilyasiya edərək kökündən uzaqlaşdırmağa çalışır.
Üçüncüsü, bu gün atılan qərəzli addımların arxasında təbii ki, Kanadada və ABŞ-da fəaliyyət göstərən erməni lobbisinin böyük təsiri var. Məhz Kanadanın xarici işlər nazirinin yetişdiyi fransızdilli Kvebek əyaləti erməni lobbisinin əsas fəaliyyət mərkəzlərindən biridir. Görünən də odur ki, Ermənistana qarşı böyük sevginin arxasında bu ölkənin lobbisi və maraqları dayanır.
Dördüncüsü, Kanadanın xarici işlər naziri bu ölkədə separatizmin əsas dəstəkçisidir. Azərbaycan isə öz ərazi bütövlüyünü bərpa və suverenliyini bərqərar edib. BMT-nin və ayrı-ayrı beynəlxalq təşkilatların nümayəndələri azad edilmiş ərazilərimizdə olublar və lokal xarakterli antiterror tədbirləri zamanı yerli əhaliyə heç bir ziyanın dəymədiyini təsdiqləyiblər. Bu səbəbdən də xanım nazirin söylədikləri cəfəngiyatdan başqa bir şey deyil”, - deyə Milli Məclis sədrinin müavini vurğulayıb.
A.Əliyevin sözlərinə görə, onlar başa düşürlər ki, Azərbaycan hökumətinin təmsilçisi erməni icmasının nümayəndələri ilə müxtəlif görüşlər keçirir, lazım olan humanitar dəstək verilir. Belə olan halda, Ermənistanın sülh müqaviləsi imzalamasının qarşısını almaq üçün Fransanın, Kanadanın və digərlərinin atdıqları addımlar əbəsdir.
“Kanada tərəfindən verilmiş bəyanatların heç bir əhəmiyyəti olmamaqla bərabər, Azərbaycanla təhdid dilində danışmağa heç kəsin də haqqı yoxdur. Görünür, xanım nazir ölkəsini hansı simada təmsil etdiyini unudub, düşünüb ki, əvvəl olduğu kimi turizm, əsas dillər və frankofoniya naziridir və İrəvana səfəri də turizmlə bağlıdır. Ədaləti heçə saymaqla bərabər, ölkəmizin qüdrətini və imkanlarını doğru qiymətləndirməyib, nəticədə belə əhəmiyyətli səhvə yol verib”, - deyə o vurğulayıb.
Bölmənin digər xəbərləri
