AFFA AZƏRBAYCAN-UELS MATÇINA BİR SIRA YENİLİKLƏR HAZIRLAMIŞDIR
Azərbaycan milli yığma komandası ilk görüşünü bu il sentyabrın 4-də Tofiq Bəhramov adına Respublika stadionunda Uels komandası ilə keçirəcək. Milli komandamızın məsul görüşləri ərəfəsində T.Bəhramov adına Respublika stadionunda yenidənqurma işləri aparılmışdır. Mətbuat işçiləri üçün lojalar tablonun sağ və sol tərəfindəki üstü örtülmüş sektorlara köçürülmüş, jurnalistlərin istənilən ölkəyə informasiya vermələri üçün şərait yaradılmışdır. Mətbuat işçiləri elektrik, telefon xətlərindən, İnternet xidmətindən istifadə edə biləcəklər. Onlara oyunun protokolu, digər informasiya materialları veriləcək. Fotomüxbirlər fərqləndirici geyimlə təchiz olunacaqlar.
Stadionun mərkəzi tribunası yenidən qurulmuş, tablo təmir edilmiş, stadionun səsgücləndiriciləri dəyişdirilmişdir. Azərbaycan milli yığma komandasının oyununu izləmək üçün xarici ölkələrdən çoxlu jurnalist və futbol həvəskarı gələcəyi də gözlənilir.
Əsas yenilik bilet satışı və tamaşaçıların stadiona buraxılması ilə əlaqədardır. Azərbaycan-Uels matçını bilavasitə stadiondan izləmək istəyən tamaşaçılar üçün ölkəmizdə ilk dəfə olaraq qaloqramlı və ştrix kodlu biletlər sifariş edilmişdir. Həmin biletləri saxtalaşdırmaq qeyri-mümkündür. Tamaşaçı öz bileti ilə yalnız müvafiq sektora daxil ola bilər. Bunun üçün sektorların girişində xüsusi turniketlər quraşdırılmışdır. Turniketlərin buraxıcılıq qabiliyyəti yüksək olsa da, tamaşaçıların stadiona matçın başlanmasına iki saat qalmış gəlmələri tövsiyə olunur.
Matçdan əvvəl və sonra stadionun bütün qapıları, o cümlədən uzun müddət giriş üçün istifadə olunmayan cənub qapıları da açıq olacaq.
Departamentdən onu da bildirdilər ki, Azərbaycan-Uels matçının biletləri artıq satışdadır. Futbol həvəskarları bilet almaq üçün T.Bəhramov adına Respublika stadionunun şimal və cənub kassalarına, “Lotto-yayım” şirkətinin satış köşklərinə müraciət edə bilərlər.
