AFFA Hakimlər Komitəsinin sədri mövsümün ilk hissəsindəki idarəçiliyi qiymətləndirib
Bakı,24 dekabr, AZƏRTAC
“Mövsümün ilk hissəsində çox çalışan hakim qrupu gördüm”.
AZƏRTAC xəbər verir ki, bu sözləri AFFA Hakimlər Komitəsinin sədri Frank De Bleker qurumun rəsmi saytına müsahibəsində deyib.
Misli Premyer Liqasında mövsümün ilk hissəsindəki hakim idarəçiliyini dəyərləndirən mütəxəssis ədalət təmsilçilərinin performansından razı qaldığını bildirib: “Başlanğıcda hakimlərin və VAR-ın qərarları arasında balans tapmaq vacib idi. UEFA-nın müdaxilə xəttini izlədik. Yəni, hakim meydanda öz qərarlarını verməli, VAR-ı gözləməməlidir. VAR yalnız hakimin aşkar səhv etdiyi hallarda kömək edir. Hakimlər oyunlar zamanı məsuliyyəti öz üzərlərinə götürürlər, VAR isə yalnız lazım olduqda kömək edir. Referilərimiz daha çox özünəinam və oyuna nəzarət nümayiş etdirdilər. Meydanda qərar verən hakimdir, VAR deyil. Bu, mövsümün başlanğıc nöqtəsi idi. Həmçinin, irəliləyiş edən bir qrup da gördüm. Əlbəttə ki, mükəmməl olmaq mümkün deyil. Amma birlikdə məntiqli və anlaşılan qərarlar vermək üçün əlimizdən gələni edirik. Hər gün departament, fiziki hazırlıq üzrə məşqçilər və hakim-inspektorlarla birgə eyni fəlsəfə ilə işləyirik. Hakimlərin meydanda ən yaxşı performansı göstərmələri üçün çalışırıq. İndi isə mövsümün vacib ikinci hissəsinə hazırlaşmaq vaxtıdır. Biz hazır olacağıq. Hakimlər komandamıza güvənin”.
Bölmənin digər xəbərləri
