AFFA KLUBLARI 1460 AZN MƏBLƏĞİNDƏ CƏRİMƏLƏMİŞDİR

04.10.2006 [23:25]
Çap et
A⁺ A^-

AZƏRTAC xəbər verir ki, AFFA-nın Nizam-İntizam Komitəsinin (NİK) növbəti iclası keçirilmişdir. Tədbirdə ölkə futbol çempionatının güclülər və birinci dəstələrində çıxış edən komandaların oyunlarında baş verən hadisələrə hüquqi qiymət verilmişdir.

“Olimpik”–“MKT-Araz” görüşündə qonaq komandanın, “Xəzər-Lənkəran–2”–“Bakılı” qarşılaşmasında isə yerli komandanın 4 futbolçusu sarı vərəqə aldığı üçün “MKT-Araz” 1000, “Xəzər-Lənkəran-2” 100 AZN məbləğində cərimələnmişlər. “Xəzər-Lənkəran-2”nin futbolçusu Elman Şahgəldiyev 2-ci sarı vərəqəyə görə qırmızı vərəqə aldığı üçün növbəti oyundan kənarlaşdırılmış, klub isə 20 AZN məbləğində cərimə olunmuşdur.

“Göyəzən”–“Rote Fahne” görüşündə qonaq komandanın futbolçusu Ramin Zeynalov qırmızı vərəqə aldığı üçün növbəti oyuna buraxılmayacaqdır. Klub isə 20 AZN məbləğində cərimə edilmişdir. “Anşad Petrol”–“Ədliyyə” görüşündə yerli klubun futbolçusu Əliş Mürvətov öz komanda yoldaşını vurduğuna görə növbəti 2 oyundan kənar edilmiş və “Anşad Petrol”a 200 AZN məbləğində cərimə kəsilmişdir. Qonaq komandanın futbolçusu Azər Həsənov isə 2-ci sarı vərəqəyə görə qırmızı vərəqə ilə cəzalandığı üçün növbəti oyundan kənarlaşdırılmış, klub 20 AZN məbləğində cərimələnmişdir.

“Arsenal”–“Şərur” oyununun protokolunun gecikdirilməsi üzündən yerli klub 100 AZN məbləğində cərimə olunmuşdur.