Ağcabədi kümçüləri bu günədək 55 tondan çox barama təhvil veriblər
Ağcabədi, 17 iyun, AZƏRTAC
Ağcabədi rayonunda barama tədarükü davam edir. Artıq kümçülərin yetişdirdikləri 55 min 92 kiloqram məhsul rayonda “Azəripək” MMC nümayəndələri tərəfindən qəbul edilib.
AZƏRTAC-ın bölgə müxbiri xəbər verir ki, bu il Ağcabədi rayonunda 1500 qutu (28 min 500 qram) ipəkqurdu toxumu yetişdirilib. Əvvəlki illərdə yetişdirilən məhsulun bəhrəsini görən ağcabədili kümçülər cari ildə daha çox məhsul istehsal etməyi qarşıya məqsəd qoyublar. Rayon üzrə 60 tona yaxın barama tədarük ediləcəyi gözlənilir.
Qeyd edək ki, Ağcabədi rayonunda baramaçılıq 1990-cı illərin əvvəllərində tənəzzülə uğrasa da, 2016-cı ildə yenidən bərpa edilməyə başlanılıb. Həmin il rayonda 3675 kiloqram, 2017-ci ildə 16 min 761 kiloqram, 2018-ci ildə 37 min 146 kiloqram, 2019-cu ildə isə 54 min 466 kiloqram barama istehsal olunub.
Bölmənin digər xəbərləri
