Fatih Birol: İndiyədək strateji neft ehtiyatlarından 325 milyon barel bazara çıxarılıb
Bakı, 8 oktyabr, AZƏRTAC
Beynəlxalq Enerji Agentliyinə (IEA) üzv ölkələr Hörmüz boğazı böhranının enerji bazarlarına davamlı təsirinə görə strateji neft ehtiyatlarının istifadəsini sürətləndirəcək.
AZƏRTAC xarici mediaya istinadla xəbər verir ki, bunu Beynəlxalq Enerji Agentliyinin icraçı direktoru Fatih Birol deyib.
O, bu addımın üzv dövlətlərin mart ayında qəbul edilmiş birgə fəaliyyət planı çərçivəsində atılacağını bildirib: “Dizel bazarında davam edən təchizat sıxıntısı səbəbindən dizel ehtiyatlarının mümkün qədər istifadə edilməsinə üstünlük veriləcək. İştirakçılar IEA-nın Hörmüz böhranı ilə bağlı addımlarını dəstəkləyir və üzv dövlətlər mart ayında qəbul edilmiş birgə fəaliyyət planı çərçivəsində öhdəliklərini təkrarlayıb. Üzv ölkələr G7 liderlərinin qlobal enerji təhlükəsizliyi və bazar sabitliyi ilə bağlı son bəyanatını alqışlayır və enerji ticarətinin sərbəst axınının vacibliyini vurğulayır”.
Fatih Birol üzv ölkələrin gələn həftəyə planlaşdırılan IEA-nın İdarə Heyətinin iclasında hadisələrin yenidən qiymətləndirilməsi barədə razılığa gəldiyini və birgə tədbirlər çərçivəsində indiyə qədər təxminən 325 milyon barel neftin bazara çıxarıldığını bildirib. O, bəzi ölkələrin ilkin öhdəliklərini aşdığını və yerinə yetirilməmiş öhdəliklər yerinə yetirilərsə, bazara təxminən 100 milyon barel daha çox neft buraxıla biləcəyini deyib.
İcraçı direktor IEA üzv ölkələrin hökumət tərəfindən saxlanılan təxminən 1,1 milyard barel strateji neft ehtiyatlarına sahib olduğunu və bunun 200 milyon barelindən çoxunun dizel ehtiyatları olduğunu bildirib: “IEA lazım gələrsə, bu ehtiyatlardan bazara daha çox neft buraxmağa hazırdır”.
Bölmənin digər xəbərləri
