Ağdaşda ictimai nəqliyyatda oğurluq edən şəxs saxlanılıb
Bakı, 7 yanvar, AZƏRTAC
Ağdaş Rayon Polis Şöbəsinə ərizə ilə müraciət edən rayon sakini ictimai nəqliyyatda çantasından pul və sənədlər olan pulqabısının naməlum şəxslər tərəfindən oğurlandığını bildirib.
Daxili İşlər Nazirliyinin mətbuat xidmətinin Şəki regional qrupundan AZƏRTAC-a verilən məlumata görə, müraciətlə əlaqədar polis əməkdaşlarının keçirdikləri əməliyyat-axtarış tədbirləri nəticəsində oğurluğu törətməkdə şübhəli bilinən Samux rayon sakini Səlbinaz Həsənova saxlanılıb. Davam etdirilən əməliyyat-istintaq tədbirləri zamanı saxlanılan şəxsin daha bir cinayət əməlinin üstü açılıb. Belə ki, onun şəhər ərazisində xətt avtobusunda qadının çantasından pul və bank kartları oğurladığı müəyyənləşdirilib.
Faktla bağlı Ağdaş Rayon Polis Şöbəsində cinayət işi başlanıb. S.Həsənovanın digər cinayət əməllərində iştirakının olub-olmaması araşdırılır.
Bölmənin digər xəbərləri
