SİYASƏT
Ağstafada dövlət qulluqçularının peşə bayramı qeyd olunmuşdur
Ağstafa, 24 iyun (AZƏRTAC, Famil Quliyev). İyunun 24-də Ağstafa Rayon İcra Hakimiyyətində dövlət qulluqçularının peşə bayramı münasibətilə tədbir keçirilmişdir.
AZƏRTAC xəbər verir ki, tədbirdə Azərbaycanda hüquqi, demokratik dövlət quruculuğu və dövlət işində çalışanlara münasib iş və istirahət şəraitinin yaradılmasının ulu öndər Heydər Əliyevin adı ilə bağlı olduğu xüsusi vurğulanmışdır. Diqqətə çatdırılmışdır ki, Azərbaycan Respublikasının Prezidenti İlham Əliyev son illərdə dövlət qulluqçularının və onların ailələrinin sosial müdafiəsinin yaxşılaşdırılması, əmək haqlarının artırılması istiqamətində bir neçə Sərəncam imzalamışdır. Ölkəmizdə dövlət qulluqçularının əməyinin qiymətləndirilməsi daim Azərbaycan rəhbərliyinin diqqət mərkəzində olur. Bu qayğının nəticəsidir ki, ötən illərdə Ağstafa rayonundan da bir neçə nəfər “Dövlət qulluğunda fərqlənməyə görə” medalı ilə təltif edilmişdir.
Tədbirin sonunda rayonun sosial-iqtisadi inkişafında və xidmətdə fərqləndiklərinə görə bir qrup dövlət qulluqçusu rayon icra hakimiyyətinin fəxri fərmanı ilə təltif edilmişdir.