Ağsuçayda baş su qəbuledici qurğu tikilib VİDEO
Bakı, 6 fevral, AZƏRTAC
Ağsuçayda baş su qəbuledici qurğu tikilib, Cavanşir gölündə təmir işləri aparılıb.
Meliorasiya və Su Təsərrüfatı Açıq Səhmdar Cəmiyyətinin nümayəndəsi Dilqəm Şərifov AZƏRTAC-a bildirib ki, Ağsu rayonunda meliorativ tədbirlər uğurla davam edir. Suvarılmanın yaxşılaşdırılması üçün Ağsu rayonunun ərazisində yerləşən Qazanarx kanalı yenidən qurulub. Ağsuçayın məcrasında isə baş su qəbuledici qurğu tikilib. Əvvəlki illərdə Ağsuçaydan su götürmək üçün xeyli çətinliklər yaranırdı. Bu qurğunun tikintisindən sonra saniyədə 5 kubmetr su götürmək üçün dəmir-beton kanal da çəkilib.
Baş su qəbuledici qurğu bir neçə hissədən ibarətdir. Qurğu çayın məcrasını ortadan su aşırımlı bənd vasitəsilə kəsir. Bu da suyun səviyyəsinin qaldırılmasına, eyni zamanda kanalların su götürməsinə kömək edir.
Qurğunun əsas üstünlüklərindən biri də çaya gələn sel sularının qarşısını almasıdır. Yekunlaşan işlər Tikilməkdə Olan Meliorasiya və İrriqasiya Obyektlərinin Birləşmiş Müdriyyəti tərəfindən həyata keçirilib. Qazanarx kanalının əsas iş prinsiplərindən biri də suvarmanın aparılmadığı vaxtlarda Cavanşir gölünün su ilə doldurulmasına töhvə verməkdir. Bu məqsədlə göldə təmir-bərpa işləri aparılıb.
Qeyd edək ki, Tikilməkdə Olan Meliorasiya və İrriqasiya Obyektlərinin Birləşmiş Müdriyyəti tərəfindən Ağsu rayonu ilə yanaşı, Hacıqabul və Şamaxı rayonlarında da yeni nasos stansiyalar tikilərək istifadəyə verilib.
Bölmənin digər xəbərləri
