Aİ-də elektrik skuterləri üçün vahid qaydalar tələb olunur
Brüssel, 16 iyun, AZƏRTAC
Avropa İttifaqında elektrik skuterlərinin istifadəsi sürətlə artsa da, bu sahədə vahid hüquqi çərçivənin olmaması narahatlıq doğurur.
AZƏRTAC xəbər verir ki, ekspertlər və nəqliyyat təhlükəsizliyi təşkilatları Aİ-ni bütün üzv ölkələr üçün ümumi standartlar hazırlamağa çağırırlar. Məqsəd təhlükəsizliyi artırmaq, istifadə qaydalarını aydınlaşdırmaq və fərqli milli tələblərdən yaranan problemləri aradan qaldırmaqdır.
Təkliflər arasında skuterlər üçün maksimal 20 km/saat sürət həddi, daha effektiv əyləc sistemləri, məcburi işıqlandırma və xəbərdarlıq siqnalları yer alır. Həmçinin bəzi ekspertlər minimum yaş həddinin müəyyənləşdirilməsini və qoruyucu dəbilqədən istifadəni tövsiyə edirlər.
Mütəxəssislər hesab edirlər ki, vahid qaydalar həm istifadəçilərin, həm piyadaların, həm də şəhər infrastrukturunun təhlükəsizliyinə müsbət təsir göstərəcək və mikromobillik xidmətlərinin davamlı inkişafını təmin edəcək.
Bölmənin digər xəbərləri
