Aİ-nin sammitində istixana qazı tullantılarının azaldılmasına dair razılaşma əldə olunub
Bakı, 12 dekabr, AZƏRTAC
Avropa İttifaqının (Aİ) liderləri Brüsseldə keçirilən sammitdə 1990-cı illə müqayisədə atmosferə atılan istixana qazı tullantılarının onilliyin sonunadək ən azı 55 faiz azaldılması barədə razılığa gəliblər.
AZƏRTAC “Euronews” kanalına istinadla xəbər verir ki, bu qərar iqlim üzrə qarşıdakı istirahət günlərində BMT-də keçiriləcək görüşdən əvvəl yaranmış mürəkkəb vəziyyətin çözülməsinə zəmin yaradacaq.
Özünün “Twitter” səhifəsində bu barədə məlumat verən Avropa Komissiyasının sədri Ursula fon der Lyayen bildirib ki, bununla 2050-ci ilədək iqlim neytrallığına nail olmaq üçün geniş yol açılıb.
Aİ-nin rəhbəri Şarl Mişel Avropanın iqlim dəyişikliyinə qarşı mübarizədə liderə çevrildiyini məmnunluqla qeyd edib.
Sammit ərəfəsində ətraf mühitin qorunması üzrə təşkilatların fəalları və ilk növbədə, “Greenpeace” təşkilatı atmosferə tullantıların maksimum azaldılmasına yönəlik etiraz aksiyalarını davam etdirir. Aksiya iştirakçıları bundan sonra da Aİ liderlərinə sözügedən məsələ ilə bağlı təzyiq göstərəcəklərini bildirib.
Danışıqlarda irəliləyiş beş il əvvəl Kioto Protokolunu əvəz edən Paris İqlim Razılaşmasının imzalandığı ərəfədə baş verib. Bu razılaşma, vaxtilə “qlobal istiləşmə templərinin azaldılması istiqamətində tarixi dönüş” adlandırılıb.
Bölmənin digər xəbərləri
