“Ailə könüllüləri” layihəsi çərçivəsində onlayn görüş
Bakı, 21 avqust, AZƏRTAC
Azərbaycan Respublikasının Ailə, Qadın və Uşaq Problemləri üzrə Dövlət Komitəsi tərəfindən “Ailə könüllüləri” layihəsi uğurla davam etdirilir.
Komitədən AZƏRTAC-a bildirilib ki, ailələrdən ibarət geniş könüllü şəbəkəsinin formalaşdırılmasına dəstək verən layihə ictimaiyyət arasında böyük rəğbətlə qarşılanıb və start verildiyi tarixdən bu günədək layihəyə 44 ailə qoşulub.
Ailə könüllülərinin iştirakı ilə ilk onlayn görüş “Zoom” proqramı vasitəsilə avqustun 21-də baş tutub. Görüşdə 21 rayondan 22 ailə olmaqla Bakı şəhərinin Nərimanov, Nizami, Nəsimi, Qaradağ, Suraxanı rayonlarından, Sumqayıt, Gəncə, Yevlax şəhərlərindən, həmçinin Biləsuvar, Xaçmaz, Qusar, Qazax, Kürdəmir, Lerik, Sabirabad, Salyan, Şamaxı, Zərdab, Tərtər, Ucar, Hacıqabul rayonlarından olan ailələr iştirak edib.
Görüşü açan Ailə, Qadın və Uşaq Problemləri üzrə Dövlət Komitəsinin sədr müavini Aynur Sofiyeva layihənin milli-mənəvi dəyərlərimizin, sağlam həyat tərzinin, möhkəm ailə modelinin təbliği, müsbət həyat hekayələrinin yayılması, ailələrin asudə vaxtının səmərəli təşkilinə töhfə olduğunu qeyd edib. Layihə çərçivəsində risk qrupundan olan ailələrə, yaşlı nəslin nümayəndələrinə, həmçinin gənclərə yönəlik fəaliyyətə həssaslıqla yanaşılmasının vacibliyini vurğulayan A.Sofiyeva bu istiqamətdə işin koordinasiyalı şəkildə həyata keçirilməsinin əhəmiyyətini qeyd edib. O, ölkəmizdə könüllülük fəaliyyətinin təbliği və təşviqi istiqamətində əhəmiyyətli addımlar atıldığını, normativ hüquqi bazanın təkmilləşdirildiyini və bu istiqamətdə dövlət dəstəyi mexanizmlərinin mövcudluğunu iştirakçı ailələrin diqqətinə çatdırıb. Azərbaycanın müxtəlif regionlarından olan ailələrin layihəyə yüksək həvəslə qoşulduğunu vurğulayan A.Sofiyeva onların pandemiya dövründə gördüyü işlərin komitə tərəfindən yüksək qiymətləndirildiyini qeyd edib.
Layihəyə qoşulan ailələr pandemiya dövründəki fəaliyyətlərinin davamlı olacağını bildirib, xalqımızın xeyirxahlıq, humanizm, yardımlaşma kimi prinsiplərə sadiqliyini bir daha nümayiş etdiriblər.
Görüşdə iştirak edən könüllü ailələrin layihə ilə əlaqədar təklifləri dinlənilib, gələcək fəaliyyətin yeni istiqamətləri müəyyənləşdirilib.
Ailələrin iştirakı ilə görüşlərin mütəmadi keçirilməsi nəzərdə tutulur.
Bölmənin digər xəbərləri
