Akademik Budaq Budaqov Azərbaycan coğrafiya elminin inkişafına dəyərli töhfələr verib
Bakı, 27 fevral, AZƏRTAC
Fevralın 27-də Azərbaycan Milli Elmlər Akademiyasında (AMEA) görkəmli alim, Əməkdar Elm Xadimi, “Şərəf”, “Şöhrət” və “İstiqlal” ordenli akademik Budaq Budaqovun 90 illik yubileyi keçirilib.
AZƏRTAC xəbər verir ki, AMEA-nın Yer Elmlər Bölməsinin akademik-katibi, akademik Fəxrəddin Qədirov görkəmli alim B.Budaqovun respublikamızda coğrafiya elminin inkişafına dəyərli töhfələr verdiyini bildirib. Qeyd olunub ki, görkəmli alim geomorfologiya, ekologiya, landşaftşünaslıq, toponimika, əhali coğrafiyası, Xəzərin problemləri və digər sahələrdə tədqiqatlar aparıb, onun əldə etdiyi nailiyyətlər bu gün də aktuallığını qoruyur. F.Qədirov alimin təkcə respublikada deyil, bütün MDB məkanında tanınan geomorfoloqlar, ekocoğrafiyaçılar və landşaftşünaslar məktəbi yaratdığını söyləyib.
AMEA-nın akademik Həsən Əliyev adına Coğrafiya İnstitutunun direktoru, akademik Ramiz Məmmədov B.Budaqovun həyat və yaradıcılığı haqqında məruzə ilə çıxış edib. Bildirilib ki, uzun illər Coğrafiya İnstitutuna rəhbərlik etmiş B.Budaqov coğrafiya elminin bir çox sahələri üzrə böyük uğurlar qazanıb. Alimin yüksək ensiklopedik biliyə və təfəkkürə, tədqiqatçı bacarığına malik olduğunu deyən R.Məmmədov vurğulayıb ki, görkəmli alim Cənubi və Qərbi Azərbaycanda, eləcə də Gürcüstan və Mərkəzi Asiyada olan türk mənşəli adları işləyərək geniş oxucu kütləsinə çatdırıb.
R.Məmmədov akademik B.Budaqovun, həmçinin dağlıq ərazilərin ən mühüm təbii dağıdıcı proseslərindən olan sel və sürüşmələri tədqiq etdiyini, sel təhlükəsinə görə Azərbaycanın rayonlaşma sxemini hazırladığını deyib. O, akademikin tədqiqatları nəticəsində ilk dəfə palçıq vulkanlarının irimiqyaslı landşaft və geomorfoloji xəritələrinin tərtib olunduğunu söyləyib.
İnstitutun direktoru diqqətə çatdırıb ki, alimin rəhbərliyi altında 50-dən çox fəlsəfə və elmlər doktoru hazırlanıb. B.Budaqovun ölkədə və xaricdə mindən çox əsərinin, o cümlədən 30 xəritə-atlas və 40 monoqrafiyasının çap olunduğu bildirilib.
Bakı Dövlət Universitetinin rektoru, akademik Abel Məhərrəmov, bu ali məktəbin kafedra müdiri, professor Tapdıq Həsənov, dramaturq Əmir Pəhləvan və başqaları alimin coğrafiya elminin inkişafındakı xidmətlərindən danışıb, onunla bağlı xatirələrini bölüşüblər.
Sonda akademikin qızı Sevinc Budaqova atasının xatirəsinə göstərilən yüksək ehtirama görə tədbirin təşkilatçılarına və iştirakçılarına minnətdarlığını bildirib.
Bölmənin digər xəbərləri
