Aleksandr Tomaşevski: Azərbaycan şirkətləri ilə əlaqələrimizi daha da inkişaf etdirmək istəyirik
Bakı, 5 may, AZƏRTAC
Bu gün Azərbaycanın “Aznur” şirkəti ilə apardığımız danışıqlar nəticəsində müqavilə imzaladıq və ildə 12 min ton ət və ət məhsulları ixrac etmək haqqında razılığa gəldik. Bununla yanaşı istehsal etdiyimiz məhsulların satışı üçün Azərbaycanda fəaliyyət göstərən “Araz” marketlər şəbəkəsi ilə da danışıqlarımız davam edir. Biz bu marketlər şəbəkəsinə ət və ət məhsullarını tədarük etmək istəyirik.
Bu sözləri AZƏRTAC-a açıqlaması zamanı “Caspian Agro Week” - 19-cu Azərbaycan Beynəlxalq Kənd Təsərrüfatı Sərgi və Forumunda iştirak edən Belarusun ən böyük ət kombinatı olan “Qrodnı” ət kombinatının ixrac şöbəsinin müdiri Aleksandr Tomaşevski deyib.
O Azərbaycan ilə əməkdaşlığı daha da genişləndirmək fikrində olduqlarını söyləyib.
“İlk növbədə ölkənin müsəlman əhalisini nəzərə alaraq yerli həmkarlarımızdan halal kəsim üsulunu öyrənib ətlik heyvanları bu üsulla kəsib, paketləyib sonra ixrac etməyi düşünürük. Bu istiqamətdə işlər aparırıq və azərbaycanlı qəssabları işə cəlb etmişik. Düşünürəm ki, yaxın vaxtlarda halal kəsimi həyata keçirəcəyik. Bu cür sərgilər hər bir müəssisə üçün geniş imkanlar açır. Bizim kombinat hər il bu sərgidə iştirak edir və buna görə də ixrac potensialımızı artıra bilmişik. Sərgi təkcə Azərbaycanda deyil, digər ölkələrdən də tərəfdaşlar tapmağa və birgə biznes qurmağa şərait yaradır. Azərbaycanın olduqca zəngin mətbəxi var və ətdən çox istifadə edirlər. Kabablar xüsusi ilə dadlı olur.
Bakıda fəaliyyət göstərən Belarus mağazalarına da məhsulu biz veririk. Kombinatda 12 cür kolbasa istehsal olunur və onların bütün növləri Azərbaycan alıcıları tərəfindən rəğbətlə qarşılanır”, - deyə A. Tomaşevski sözlərinə əlavə edib.
Bölmənin digər xəbərləri
