Alman şirkəti Misirdə yeni gəmilər inşa edəcək
Qahirə, 21 avqust, AZƏRTAC
Almaniyanın məşhur “Lürssen” gəmiqayırma şirkəti yeni gəmilərin inşası, habelə İsgəndəriyyədə gəmiqayırma zavodunun tikintisi və ixtisaslı kadrların yetişdirilməsi üzrə Misirə yardım edəcək.
AZƏRTAC Misir Prezidentinin mətbuat xidmətinin məlumatına istinadla xəbər verir ki, bu məsələlər dövlət başçısı Əbdülfəttah əl Sisinin alman şirkətinin sahibi Peter Lürsseni qəbulu zamanı müzakirə edilib. “Lürssen” şirkəti mülki təyinatlı gəmi və qayıqlarla yanaşı, Misirdə hərbi gəmilərin də inşası layihəsini həyata keçirəcək. Misir Hərbi Donanmasının komandanı, general-leytenant Əhməd Xalidin də iştirak etdiyi qəbulda həmin gəmilərin inşası üçün Almaniyadan müvafiq avadanlığın gətirilməsi də müzakirə olunub.
Qeyd olunub ki, dünyanın 8 ölkəsində gəmiqayırma zavodları olan “Lürssen” Almaniya Hərbi Donanması üçün 11 min ton yükdaşıma qabiliyyəti olan döyüş gəmiləri inşa edib. Şirkətin rəhbəri Misir Prezidentinə məlumat verib ki, İsgəndəriyyədə zavod tikmək üçün böyük sərmayə qoymaq niyyətindədir.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
