Almaniya qəzeti Avropa İttifaqının Azərbaycan-Ermənistan münasibətlərinə dəstəyindən yazıb
Berlin, 17 dekabr, AZƏRTAC
Almaniyanın “Süddeutsche Zeitung” qəzetində “Şolts və Makron Ukrayna münaqişəsində vasitəçilik etmək istəyirlər” başlıqlı məqalə dərc edilib.
AZƏRTAC xəbər verir ki, məqalədə əsasən Brüsseldə keçirilmiş Avropa İttifaqının Şərq Tərəfdaşlığı Sammiti çərçivəsində baş tutan Almaniya, Fransa və Ukrayna liderlərinin görüşündən bəhs edilir. Görüşdə Minsk razılaşmalarına əməl edilməsinin müzakirə olunduğu, habelə “Normandiya format”ı çərçivəsindəki danışıqların yenidən başlanması üzərində iş aparıldığı vurğulanır.
Məqalədə qeyd edilib ki, Sammit çərçivəsində Avropa İttifaqı Şurasının Prezidenti Şarl Mişel Azərbaycan Prezidenti İlham Əliyev və Ermənistanın baş naziri Nikol Paşinyanla görüşüb, iki ölkə arasındakı münaqişənin həllini dəstəkləməyə söz verib.
Bildirilir ki, Avropa İttifaqı regionda minaların təmizlənməsində və münaqişədən zərər çəkən insanlara kömək edilməsində dəstək göstərəcək. Həmçinin sərhədlərin müəyyən edilməsi ilə bağlı problemlər yarandığı təqdirdə, Avropa İttifaqının ekspertlər qrupunun texniki dəstək göstərməsi nəzərdə tutulur. İki ölkə arasında dəmir yolu əlaqəsinin bərpası da planlaşdırılır.
Vüqar Seyidov
AZƏRTAC-ın xüsusi müxbiri
Berlin
Bölmənin digər xəbərləri
