Almaniya vətəndaşlarını Yaxın Şərqdən təxliyə etmək üçün min hərbçi göndərib
Bakı, 28 oktyabr, AZƏRTAC
Almaniya Silahlı Qüvvələri (Bundesver) zərurət yaranacağı təqdirdə öz vətəndaşlarının Yaxın Şərqdən, ilk növbədə İsraildən təxliyəsini həyata keçirmək üçün Kipr və İordaniyaya minə yaxın hərbçi göndərib.
AZƏRTAC xəbər verir ki, DPA agentliyi bu barədə Almaniyanın güc strukturlarındakı mənbələrinə istinadla məlumat yayıb.
Məlumata əsasən, almaniyalı hərbçilərin əksəriyyəti hazırda Kiprdədir. Orada mümkün təxliyə əməliyyatını koordinasiya etmək üçün qərargah formalaşdırılıb. İordaniyada isə xüsusi təyinatlı qüvvələr dislokasiya olunub.
Bir müddət öncə KİV-də Bundesverin Kiprə əlavə qüvvələr göndərdiyi barədə informasiya yayılıb. Onların dəqiq sayı barədə məlumat verilmir.
Qeyd edək ki, Almaniya hökuməti artıq İsraildən təxliyə reysləri həyata keçirməyə başlayıb. İndiyə qədər 3,5 minə yaxın almaniyalının təxliyə olunduğu bildirilir.
Bölmənin digər xəbərləri
