Almaniyada Azərbaycanın tanıdılması məqsədilə viktorina təşkil olunmuşdur
Bakı, 24 iyun (AZƏRTAC). Azərbaycanın yüksək turizm potensialının tanıdılması məqsədilə Almaniyanın Ksanten şəhərində növbəti viktorina keçirilmişdir.
Diasporla İş üzrə Dövlət Komitəsindən AZƏRTAC-a bildirmişlər ki, viktorina Alman Azərbaycan Mədəniyyət Evinin dəstəyi ilə azərbaycanlı diaspor fəalı Emil Həsənov tərəfindən təşkil olunmuşdur.
Artıq 6 ildən çoxdur Almaniyada milli bayramlar zamanı təşkil edilən bu viktorinalar almanlar tərəfindən böyük maraqla qarşılanır. Ksanten bələdiyyəsinin təşkil etdiyi bayram tədbirlərində viktorinanın keçirilməsi üçün şərait yaradılır. Bu il keçirilən viktorinada 200 nəfərdən artıq alman iştirak etmişdir. Yarışın şərtlərinə görə viktorinada iştirak edən almanlar Azərbaycan haqqında verilən sualları cavablandırmalıdır. Sonda yarışın qalibi olan 2 və ya daha çox iştirakçı Azərbaycana 20 günlük səyahət etmək imkanı qazanır. Bu günədək 14 alman Azərbaycana səyahət edərək ölkəmiz, onun mədəniyyəti, tarixi, turizm potensialı ilə yaxından tanış olmuşdur.
Azərbaycana səfər edən qaliblər geri qayıtdıqdan sonra ölkəmiz haqqında təəssüratlarını bölüşür və beləliklə də Azərbaycanın təbliğatı aparılır. Müşahidələrə görə viktorina qaliblərinin əksəriyyəti növbəti illərdə də Azərbaycana səfər edirlər.
Budəfəki viktorinanın təşkilinə Kölndə fəaliyyət göstərən Alman Azərbaycan Mədəniyyət Evi ilə yanaşı, Azərbaycan səfirliyi də böyük dəstək göstərmişdir.
Bölmənin digər xəbərləri
