Almaniyada Fridrix Merts parlamentdə səsvermənin birinci turunda Kansler seçilə bilməyib
Berlin, 6 may, AZƏRTAC
Mayın 6-da Almaniya Bundestaqında Xristian Demokratlar İttifaqının (CDU) lideri Fridrix Mertsin Federal Kansler seçilməsi ilə bağlı səsvermə keçirilib.
AZƏRTAC xəbər verir ki, F.Mertsin Kansler seçilməsi üçün parlamentin 630 deputatından 316-sının səsi tələb olunduğu halda, onun lehinə 310, əleyhinə 307 nəfər səs verib, 3 nəfər bitərəf qalıb. Koalisiya hökumətində yer alan partiyalar - CDU, Xristian Sosialistlər İttifaqı (CSU) və Sosial Demokrat Partiyası (SPD) parlamentdə 328 deputat mandatına sahib olduğundan F.Mertsin ilk turda seçilməsi gözlənilirdi.
Qeyd edək ki, bu hal Almaniya tarixində ilk dəfə baş verir. İndiyədək heç vaxt Bundestaq seçkisindən və uğurlu koalisiya danışıqlarından sonra təyin edilmiş Kansler parlamentdə səsvermədə uğursuzluğa düçar olmayıb.
Almaniya Konstitusiyasının 63-cü maddəsinə əsasən, iki həftə ərzində səsvermənin ikinci turu keçirilməlidir. Bu seçkilərdə də deputatlardan yarıdan çoxunun səsi lazımdır. Zəruri hallarda digər şəxsin namizədliyi irəli sürülə bilər. Əgər həmin vaxt da tələb olunan çoxluq əldə olunmasa, üçüncü tur keçirilir. Üçüncü turda Kanslerin seçilməsi üçün səsvermədə iştirak edən deputatların sadə səs çoxluğu kifayət edir.
AZƏRTAC-ın xüsusi müxbiri
Berlin
Bölmənin digər xəbərləri
