Almaniyada siyasi motivli cinayətlərin sayı rekord səviyyəyə çatıb
Berlin, 20 may, AZƏRTAC
Almaniyada siyasi motivli cinayətlərin sayı 2024-cü ildə kəskin şəkildə artaraq son on ilin ən yüksək səviyyəsinə çatıb.
AZƏRTAC yerli mediaya istinadla xəbər verir ki, Federal Cinayət Polisi İdarəsinin (BKA) və Daxili İşlər Nazirliyinin açıqladığı yeni statistikaya əsasən, ötən il ölkədə 84 mindən çox belə hadisə qeydə alınıb. Bu, 2023-cü illə müqayisədə təxminən 40 faiz çoxdur. Bununla da siyasi motivli cinayətlərin sayı ardıcıl altıncı ildir artır.
Daxili işlər naziri Aleksander Dobrindt bu rəqəmləri ölkədə yeni təhlükəsizlik tədbirlərinin görülməsi üçün ciddi siqnal adlandırıb və təhlükəsizlik tədbirlərinin gücləndirilməsinin vacibliyini vurğulayıb.
Bu artımın əsas səbəbləri kimi Bundestaqa seçkilər və Yaxın Şərqdə baş verən müharibə göstərilir. Lakin artım bütün sahələrdə qeydə alınıb: antisemitizm halları 20 faiz, ksenofobiya xarakterli cinayətlər 34 faiz, zorakı cinayətlər 15 faiz artıb. Hadisələrin təxminən dörddəbiri internet məkanında baş verib.
Ümumi hadisələrin 50 faizi sağçı ekstremistlərə aid edilir. Solçu ekstremistlər hadisələrin 12 faizinə cavabdeh olub. Həmçinin əcnəbi və ya dini ideologiyaya əsaslanan cinayətlərin sayı da artıb.
Cinayətlərin növləri arasında 37 faizlə təbliğat xarakterli olanlar üstünlük təşkil edir. Bu sahədə də ən çox cinayət sağçı ekstremistlər tərəfindən törədilib. İkinci yerdə (21 faiz) əmlakın zədələnməsi, daha sonra isə təhqir və xalqı kinə təhrik etmə hallar yer alır.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
