ALTAY HƏSƏNOV: AZƏRBAYCAN GİMNASTLARININ AVROPA ÇEMPİONATINDA ÇIXIŞININ NƏTİCƏLƏRİ QƏNAƏTBƏXŞDİR
A.Həsənovun fikrincə, gimnastlarımızın belə mötəbər turnirdə çıxışını ümumən qənaətbəxş saymaq olar. O xüsusi vurğulamışdır ki, 2002-ci ilin oktyabrında Mehriban xanım Əliyeva Gimnastika Federasiyasının prezidenti seçildikdən və rəhbərliyə təzə adamlar gəldikdən sonra bədii gimnastikamızın inkişafında keyfiyyətcə yeni mərhələ başlandı. A.Həsənov demişdir: Həmin vaxtdan idmanın bu gözəl növünə böyük diqqət yetirilir və yığma komandamızın dünya meydanına çıxmasına çox güclü təkan verilmişdir. İndi qətiyyətlə demək olar ki, Azərbaycanda idmanın bu növü sürətlə, yüksələn xətlə inkişaf edir. Bədii gimnastikada böyük tərəqqi müşahidə olunur və biz hesab edirik ki, onun bügünkü səviyyəsi tamamilə qənaətbəxşdir.
Bədii gimnastika üzrə 22-ci Avropa çempionatı bir daha göstərdi ki, artıq açıq-aydın zəif komandalar yoxdur, gimnast qızlar, xüsusilə yeniyetmələr arasında kəskin rəqabət gedir. Bu mötəbər yarışda Azərbaycanı iki yeniyetmə gimnastımızın - Zeynəb Cavadlı və Leyla Şamilovanın təmsil etməsi idmançılarımızın səviyyəsindən xəbər verir. Belə faktı da ümidverici hesab etmək olar ki, Zeynəb gürzlə hərəkətlərdə Avropada 8-ci yeri tutmuşdur. Çempionatın nəticələri göstərir ki, biz növbəti yarışlarda vəziyyəti dəqiq qiymətləndirə biləcəyik. Birmənalı demək olar ki, yeniyetmələr arasında tərəqqi var və ustalığın səviyyəsinin artırılması istiqamətində iş aparılacaqdır.
A.Həsənov Aliyə Qarayeva və Anna Qurbanovanın çıxışlarından danışaraq bildirmişdir ki, Avropada 6-cı yer parlaq gələcəkdən xəbər verir. Biz idmanın bu növündə lider sayılan Rusiya, Ukrayna və Belarusla yanaşı, bədii gimnastikanın elitasına daxil olmuşuq. Aliyə Qarayevanın göstəricilərini çox uğurlu hesab edirik”.
A.Həsənov qrup komandaları arasında yarışları şərh edərək xatırlatmışdır ki, komandamız, praktik olaraq, ötən ilin fevralında yaradılmış və dünya çempionatında ilk dəfə çıxış etmişdir. Təcrübəsizlər üçün bu, yaxşı debüt idi, elə indi də gimnastlarımız getdikcə inamla çıxış edirlər. Əlbəttə, biz daha yüksək yerlər tutmaq istəyirik və bu istiqamətdə işləyəcəyik. Ümidvarıq ki, Yunanıstanda keçiriləcək növbəti dünya çempionatının qrup yarışlarında Olimpiya oyunlarına lisenziya alacaq, habelə fərdi çıxışlara iki vəsiqə qazanacağıq. Xüsusi qeyd etmək istəyirəm ki, federasiyamızın prezidenti Mehriban xanım Əliyeva uğurlarımızı diqqətlə izləyir, daim bizimlə, kollektivlə əlaqə saxlayır. O, uğurlarımıza bizimlə birlikdə ürəkdən sevinir, uğursuzluqlarımıza görə kədərlənir. Bir sözlə, əminəm ki, işin belə nümunəvi təşkili yaxşı gələcəkdən xəbər verir.
Altay Həsənov çıxışlar zamanı gimnastlarımızı dəstəklədiyinə görə Moskvadakı Azərbaycan Gənclərinin Əlaqələndirmə Şurasına təşəkkürünü bildirmişdir. O demişdir: “Üç gün dalbadal gənclər gimnastlarımıza fəal azarkeşlik etmişlər ki, bu da qızlarımızı qələbəyə ruhlandırırdı. Həmvətənlərimiz turnirə mütəşəkkil - transparantlar və bayraqlarla gəlirdilər. Zənnimcə, heç də hər bir komandanın tribunalarda belə sıx birləşmiş azarkeşləri yox idi. Bu cür azarkeşləri olan komanda zəif nəticə göstərə bilərmi? Onu da deyim ki, Leyla xanım Əliyeva da Moskvada idmançılarımıza ürəkdən azarkeşlik edirdi. O, hamı ilə birlikdə gimnastlarımızın sevincinə şərik olmuş və azarkeşlərimizin mütəşəkkilliyini xüsusi vurğulamışdır”.
Bununla belə, A.Həsənov komandamızın çıxış etdiyi bu mötəbər yarışa Ümumrusiya Azərbaycan Konqresinin etinasızlığından təəssüfləndiyini bildirmişdir. Onun fikrincə, ÜAK daha çox həmvətənlərimizin yarışları izləməsini təmin edə, Azərbaycanın idman şərəfini qoruyan gimnast qızlarımıza diqqət göstərə bilərdi.
Bölmənin digər xəbərləri
