Altıncı “Yüksəliş” müsabiqəsinin qaliblərinin adları açıqlanıb
Bakı, 22 iyul, AZƏRTAC
Altıncı “Yüksəliş” müsabiqəsinin qalibləri müəyyənləşib.
Müsabiqənin işçi qrupundan AZƏRTAC-a bildirilib ki, müsabiqənin final mərhələsində iştirak edən 129 namizəd arasından ən yüksək nəticə göstərən 20 nəfər qalib adını qazanıb. Qaliblər arasında ən gənc iştirakçının 24, ən yaşlı iştirakçının isə 38 yaşı var.
Üç gün davam edən final mərhələsində namizədlərin idarəetmə bacarıqları fərdi və komanda tapşırıqları əsasında qiymətləndirilib. Yarımfinal mərhələsində iştirakçılar strateji düşüncə, effektiv liderlik, qərarvermə, nəticəyönümlülük, işin effektiv idarə olunması, adaptivlik, innovativ düşüncə, komanda işi və əməkdaşlıq, eləcə də etika və dürüstlük olmaqla 9 səriştə üzrə ekspertlər tərəfindən dəyərləndiriliblər.
Final mərhələsində isə iştirakçıların fəaliyyəti “İdarəçi rollar modeli” əsasında qiymətləndirilib. Bütün mərhələləri uğurla başa vuran və ən yüksək nəticə göstərən 20 iştirakçı müsabiqənin qalibi olub.
Qaliblərin 15-i kişi, 5-i qadındır. Yaş qrupları üzrə təhlilə əsasən, ən yüksək göstərici 21-30 yaş aralığında qeydə alınıb. Belə ki, qaliblərdən 11 nəfər bu yaş qrupuna, 9 nəfər isə 31-40 yaş qrupuna daxildir.
İqtisadi rayonlar üzrə nəticələrə görə, ən çox qalib Bakı şəhərini təmsil edir. Qaliblərdən 9 nəfər paytaxtın, 3 nəfər Qazax-Tovuz, 2 nəfər Qarabağ, hər biri 1 nəfər olmaqla Mil-Muğan, Lənkəran-Astara, Şirvan-Salyan, Şərqi Zəngəzur, Abşeron-Xızı və Quba-Xaçmaz iqtisadi rayonlarının nümayəndəsidir.
Təhsil göstəricilərinə əsasən, bakalavriat səviyyəsində qaliblər əsasən Azərbaycan Dövlət İqtisad Universitetinin, Prezident yanında Dövlət İdarəçilik Akademiyasının, ADA Universitetinin, Milli Aviasiya Akademiyasının və Azərbaycan Dövlət Neft və Sənaye Universitetinin məzunlarıdır.
Magistratura səviyyəsində uğur qazanan iştirakçılar arasında Azərbaycan Dövlət İqtisad Universitetinin, Azərbaycan Dövlət Neft və Sənaye Universitetinin, “EU Business School Barcelona”, Massaçusets Texnologiya İnstitutu və Stokholm Universitetinin məzunları üstünlük təşkil edir. Doktorantura və aspirantura səviyyəsində təhsil alan bir qalib isə Azərbaycan Dövlət İqtisad Universitetinin məzunudur.
Bildirilib ki, 20 qalibin hamısı bakalavriat təhsilini Azərbaycanda alıb. Magistratura təhsili alan 16 qalibdən 10-u bu təhsil pilləsini Azərbaycanda, 5-i xaricdə, 1-i isə həm Azərbaycanda, həm də xaricdə başa vurub. Doktorantura və aspirantura səviyyəsində təhsil alan qalib isə təhsilini Azərbaycanda alıb.
Qaliblərin fəaliyyət göstərdikləri sahələr üzrə bölgüyə əsasən, onların 50 faizi dövlət, 45,45 faizi özəl, 4,55 faizi isə qeyri-hökumət sektorunu təmsil edir.
Yarımfinal və final mərhələlərinə hazırlıq məqsədilə qiymətləndirici ekspertlər üçün xüsusi təlim proqramı təşkil olunub. Yarımfinal mərhələsinə 103, final mərhələsinə isə 58 ekspert cəlb edilib. Təlimlər zamanı ekspertlər qiymətləndirmə meyarları, müşahidə prinsipləri, qiymətləndirmə mərkəzlərinin fəaliyyəti və ekspertlərin funksiyaları barədə məlumatlandırılıblar.
Müsabiqədə qiymətləndirmə prosesi beynəlxalq təcrübədə geniş tətbiq olunan və obyektivliyi ilə seçilən “Assessment Conference” metoduna əsasən həyata keçirilib. Bu yanaşma iştirakçıların fəaliyyətinin müxtəlif ekspertlər tərəfindən qiymətləndirilməsini və yekun qərarların kollegial şəkildə qəbul edilməsini təmin edir.
Altıncı “Yüksəliş” müsabiqəsinin qalibləri bunlardır: Faiq Xasayev, Hikmət Əliyev, Röyal Lətifli, Əlizamin Mirzəyev, Famil Məcidli, Sevda Mansurova, Şirin Şahbazov, Ağarəhim Klıçev, Elbrus İbrahimov, Əlizadə Fərzəliyev, Nəzakət Bayramova, Seyid Məlikov, Anar Əlizamanlı, Elmar Məmmədrzayev, Elnur Əliyev, Fərid Nadirov, Fidan Abbasova, Ləman Cəlilova, Mətanət Rzazadə və Rüfət Babayev.
Xatırladaq ki, “Yüksəliş” müsabiqəsi Prezident İlham Əliyevin 2019-cu il 26 iyul tarixli Sərəncamına əsasən təsis olunub. Müsabiqə qalibləri birillik fərdi inkişaf proqramı çərçivəsində mentorluq dəstəyi almaqla yanaşı, özünüinkişaf məqsədilə 20 min manat məbləğində pul mükafatı əldə etmək imkanı qazanırlar.
Altıncı “Yüksəliş” müsabiqəsinin keçirilməsi ilə bağlı müvafiq Sərəncam Prezident İlham Əliyev tərəfindən 2025-ci il dekabrın 10-da imzalanıb.
Bölmənin digər xəbərləri
