“Amazon” Britaniyaya 54 milyard dollar investisiya qoyur
London, 24 iyun, AZƏRTAC
Elektron ticarət nəhəngi “Amazon” şirkəti Böyük Britaniyaya qarşıdakı üç il ərzində 40 milyard funt sterlinq (təxminən 54 milyard dollar) investisiya qoyacağını açıqlayıb.
AZƏRTAC “Reuters”ə istinadla xəbər verir ki, plan çərçivəsində “Amazon” East Midlands bölgəsində 2027-ci ildə istifadəyə veriləcək iki müasir anbar inşa edəcək.
Bundan əlavə, Hull və Northampton şəhərlərində bu və gələn il istifadəyə veriləcək anbarlar da planlaşdırılıb. Hər iki məkanda 2000 iş yeri yaradılacaq. Şirkət, həmçinin Birləşmiş Krallıq boyunca yeni çatdırılma mərkəzləri quracaq, mövcud 100-dən artıq əməliyyat binasını təkmilləşdirəcək.
Bu investisiya planına “Amazon”un bulud texnologiyaları bölməsi tərəfindən 2024-2028-ci illərdə data mərkəzlərinin inşası və istismarı üçün ayrılmış 8 milyard funt da daxildir.
Hazırda “Amazon” ölkədə 75 min nəfəri çalışdırır və bu göstərici ilə özəl sektorda ilk onluğa daxildir.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
