ANKARADA ATATÜRKÜN BU ŞƏHƏRƏ GƏLİŞİNİN 86-CI İLDÖNÜMÜ TƏNTƏNƏLİ ŞƏKİLDƏ QEYD OLUNMUŞDUR
Əvvəlcə ənənəvi “Atatürk qarnizon yürüşü” təşkil olunmuş və bu yürüşdə ordunun Quru Qoşunları Məktəbi Komandanlığından 600 hərbçi, Prezidentin Mühafizə Alayı Komandanlığından 105 əsgər və Ankaradakı digər komandanlıqları təmsil edən 37 bayraqdar iştirak etmişdir.
Hərbi Məktəb prospektindən başlanan yürüşdə əllərində türk bayrağı və Atatürkün portretləri olan əsgərlər “Nə mutlu türküm deyənə”, “Vətən, sənə canım fəda”, “Hər şey vətən üçün” şüarlarını səsləndirmişlər. Onlar İsmət İnönü, Atatürk, Qazi Mustafa Kamal bulvarlarını və Anıt prospektini keçərək Anıtqəbirə gəlmişlər. Türkiyə Böyük Millət Məclisinin sədri Bülənt Arınç Atatürkün Ankaraya gəlişinin ildönümü münasibətilə verdiyi bəyanatında Amasya, Ərzurum və Sivasdan sonra Mustafa Kamal Atatürkün 1919-cu ilin dekabrın 27-də bu şəhərdə də böyük ehtiramla qarşılandığını bildirmişdir.
Baş nazir Rəcəb Tayyib Ərdoğan da bəyanatında bildirmişdir ki, Mustafa Kamal Atatürkü sevgi, ehtiram və inamla qarşılayan ankaralılar Qurtuluş Savaşı illərındə Anadolunun kiçik şəhərini Türkiyənin siyasi, sosial və mədəni mərkəzinə çevirərək, dünyanın müasir paytaxtları sırasına çıxarmışlar.
Bölmənin digər xəbərləri
