SİYASƏT
ANTARA agentliyi Azərbaycan-İndoneziya diplomatik əlaqələrinin 30-cu ildönümünə həsr olunmuş məqalə yayıb
Cakarta, 5 aprel, AZƏRTAC
İndoneziyanın ANTARA agentliyi Azərbaycan ilə bu ölkə arasında diplomatik münasibətlərin qurulmasının 30-cu ildönümünə həsr olunmuş məqalə yayıb.
AZƏRTAC xəbər verir ki, “Azərbaycan və İndoneziya diplomatik əlaqələrinin 30 illiyini qeyd edir” (“Azerbaijan dan Indonesia rayakan 30 tahun hubungan diplomatik”) sərlövhəli məqalənin müəllifi ölkəmizin İndoneziyadakı səfirliyinin ikinci katibi İntiqam Hüseynovdur.
Məqalədə iki ölkə arasında diplomatik əlaqələrin qurulması, inkişaf tarixi, ötən illər ərzində iki ölkə arasında yaranmış dostluq və əməkdaşlıq əlaqələri haqqında geniş məlumat verilib. Ötən 30 il ərzində, xüsusən Azərbaycan Prezidenti İlham Əliyevin və İndoneziya Prezidenti Coko Vidodonun rəhbərliyi ilə iki ölkə arasında siyasi, iqtisadi, mədəni, humanitar və bir çox digər sahələrdə güclü və etibarlı əməkdaşlıq əlaqələrinin, o cümlədən qarşılıqlı siyasi dəstəyin olduğu qeyd edilib.
Bununla yanaşı, yazıda 30 ilə yaxın müddət ərzində Ermənistanın Azərbaycana qarşı hərbi təcavüzünü ən sərt şəkildə pisləyən ölkələrdən birinin İndoneziya olduğu xüsusi vurğulanıb. Habelə, ardıcıl dəstəyin davamı olaraq, II Qarabağ müharibəsi zamanı İndoneziya Xarici İşlər Nazirliyinin və bu ölkənin parlamentinin Azərbaycanı dəstəkləyən bəyanatlarla çıxış etdiyi diqqətə çatdırılıb. Eyni zamanda, Birləşmiş Millətlər Təşkilatı, İslam Əməkdaşlıq Təşkilatı və Qoşulmama Hərəkatı kimi beynəlxalq təşkilatlarda qeyd-şərtsiz qarşılıqlı dəstəyin mövcud olduğu bildirilib. Bu xüsusda, Azərbaycan Prezidentinin Qoşulmama Hərəkatı çərçivəsində COVID-19 pandemiyası ilə birgə mübarizə təşəbbüsünün İndoneziya tərəfindən dəstəklənməsindən məmnunluq ifadə edilib.
Məqalədə, həmçinin bu illər ərzində iki ölkə arasında ticarət dövriyyəsinin həcminin əhəmiyyətli dərəcədə artaraq 174,1 milyon ABŞ dollarına çatdırıldığı, o cümlədən investisiyalar və turizm sahələrində əlaqələrin genişləndirildiyi bildirilib. Habelə keçirilmiş mədəniyyət tədbirləri, vətəndaşlara xidmət sahəsində təcrübə mübadiləsi və təhsil sahəsində tələbələrin mübadiləsi kimi mövzulardan bəhs olunub.
Məqalə geniş oxucu kütləsinin marağına səbəb olduğu üçün “gpriority.co.id”, “kempalan.com”, “citayambersatu.com”, “24hour.id”, “warnaplus.com” və “koranpelita.com” kimi xəbər portallarında da yayımlanıb.
Vüqar Ağayev
AZƏRTAC-ın xüsusi müxbiri
Cakarta