Antiterror tədbirlərinin nəticəsi təsdiqlədi ki, Qarabağda yaşayan erməni əhalisi hədəf deyil – ŞƏRH
Bakı, 22 sentyabr, AZƏRTAC
Üç il əvvəl Ermənistanın özünün başladığı müharibədə 44 gün ərzində acınacaqlı məğlubiyyətə uğramasından sonra düşünmək olardı ki, artıq işğalçı ölkənin başı daşdan-daşa dəydi. Düşmən və onun havadarları şahid oldular ki, Azərbaycan Ordusunun qarşısında duruş gətirə bilmirlər. Vətən müharibəsində darmadağın edilən Ermənistan ordusu canını qurtarmaq üçün beynəlxalq təşkilatlara yalvarıb-yaxarmağa, ağlayıb-sızlamağa başladılar. 2020-ci il 10 noyabr tarixli üçtərəfli Bəyanatı imzalamaqla təslim olduqlarını rəsmən təsdiqlədilər. Həmin vaxt düşməndən qənimət kimi götürülmüş silah-sursatdan böyük bir “muzey” də təşkil olundu. Bu, həm Ermənistana, həm də onun havadarlarına ibrət dərsi olmalı idi. Lakin düşmən dinc dayanmadı. Onlara himayədarlıq edənlərin fitvası ilə yenidən Azərbaycanın ərazisində təxribatlar törətdi, minalar basdırdı və dinc əhalinin, o cümlədən hərbçilərimizin qətlinə bais oldular.
Bu fikirləri AZƏRTAC-a açıqlamasında siyasi şərhçi Əliqismət Bədəlov bildirib.
O deyib ki, 1991-ci ildən başlayaraq, ermənilər Azərbaycan ərazisində 1 milyondan çox mina basdırıblar. Ölkəmizə qarşı aparılan mina terroru 3 min 400 nəfərə yaxın həmyerlimizin həyatına son qoyub. 2020-ci il 10 noyabr tarixli üçtərəfli Bəyanatdan sonra Ermənistan yenə də qəddarlığından əl çəkməmiş, mina terrorunu davam etdirmiş, nəticədə Qarabağ və Şərqi Zəngəzurda 314 nəfər həmyerlimiz bu terrorun qurbanı oldu. Həmişə olduğu kimi, bu dəfə də beynəlxalq təşkilatlar və özünü haqq-ədalətin, humanizmin, insan hüquq və azadlıqlarının carçısı hesab edən dövlətlər Ermənistanın mina müharibəsini susqunluqla qarşıladılar. Dəfələrlə bəyan edilmişdi ki, üçtərəfli Bəyanatın 4-cü bəndi kobudcasına pozulur, qanunsuz erməni silahlı qüvvələri Azərbaycan ərazisindən hələ də çıxarılmır, hərbi fəaliyyətləri davam edir və ərazilərimizi minalayırlar. Bu ədalətsizlik və beynəlxalq hüququn normalarına hörmətsizlik Ermənistanı getdikcə quduzlaşdırdı və bir neçə gün əvvəl polis əməkdaşlarının və mülki əhalinin ölümünə səbəb olan növbəti mina terrorunu həyata keçirdilər. Budəfəki terror aktı Azərbaycanın səbir kasasını daşdırdı və Qarabağda lokal xarakterli antiterror tədbirlərinin vaxtı çatdığına işarə oldu.
Ə.Bədəlov deyib ki, Prezident, Ali Baş Komandan İlham Əliyev hələ Laçında sakinlərlə görüşdə ermənilərə xəbərdarlıq etmiş və təxribatlara son qoymağa, sülh müqaviləsini imzalamağa çağırmışdı. Dövlətimizin başçısı Qarabağ ermənilərinə səslənərək demişdir ki, sizin kitabınız bağlandı. “Miatsum” kitabı bağlandı, separatizmin kitabı bağlandı. Müstəqillik xülyası statusun dalınca getdi. Statusu isə biz hələ İkinci Qarabağ müharibəsi zamanı göndərmişik lazım olan yerə. Dövlətimizin başçısı onlar üçün qalan yeganə yolu da açıqlamışdı: “Bu, Azərbaycan qanunlarına tabe olmaq, Azərbaycanın loyal normal vətəndaşı olmaq, öz saxta dövlət atributlarını zibil yeşiyinə atmaq və “parlament”i buraxmaqdır”.
Siyasi şərhçi deyib ki, düşmən bundan nəticə çıxarmadı, yenə də öz bildiyini etdi və layiqli cavabını aldı. Antiterror tədbirləri zamanı 90-dan artıq döyüş mövqeyi və bir sıra strateji əhəmiyyətli obyektlər Ordumuzun nəzarətinə keçdi. Bundan başqa, 7 avtomobil, 1 tank və 4 minaatan və 2 piyada döyüş maşını qənimət kimi götürüldü: “Azərbaycan Ordusu qarşısında cəmi bir sutka davam gətirə bilən silahlı ermənilər yenə də yalvarmağa, ah-zar etməyə başladılar və bu dəfə də “zavallı” maskasında peyda olmağa çalışdılar. Ancaq özü yıxılan ağlamaz. Erməni silahlıları 3 il əvvəlki məğlubiyyətdən sonra dərk etməli idilər ki, onlar Azərbaycan Ordusundan qat-qat zəifdirlər. Üzərilərinə götürdükləri öhdəliklərə əməl etməli idilər. Bu dəfə də şər-böhtana, yalana əl ataraq dünya ictimaiyyətini inandırmağa çalışdılar ki, guya Azərbaycan mülki erməni əhalisini hədəfə alıb. Prezidentin bir neçə gün əvvəl xalqa müraciətində səsləndirdiyi fikirlər ermənilərin bu yalanlarını alt-üst etdi. Prezident İlham Əliyev həmin müraciətində açıq şəkildə bəyan etdi: “Əməliyyat başlamazdan əvvəl mənim tərəfimdən bütün hərbi birləşmələrimizə bir daha ciddi tapşırıq verilmişdir ki, aparılan antiterror tədbirləri nəticəsində Qarabağ bölgəsində yaşayan erməni əhalisi zərbə altına düşməməlidir və mülki əhali qorunmalıdır. Biz həm yüksək dəqiqliyə malik silahlardan istifadə edərək buna nail olduq, eyni zamanda, Silahlı Qüvvələrimizin peşəkarlığı nəticəsində mülki vətəndaşlar tamamilə özlərini sığortalanmış vəziyyətdə hiss etmişlər. Eyni zamanda, göstəriş verilmişdir ki, mülki infrastruktura da heç bir zərbə dəyməməlidir, ancaq hərbi infrastruktur sıradan çıxarılmalıdır”.
Siyasi şərhçi deyib ki, elə də oldu. Antiterror tədbirlərinin nəticəsi də təsdiqlədi ki, Qarabağ bölgəsində yaşayan erməni əhalisi hərbçilərimizin hədəfi deyildi: “Qarabağda antiterror tədbirlərinin keçirilməsi bizim haqqımızdır. Vətən müharibəsindən sonra rəsmi İrəvan sülh müqaviləsini imzalamaqdan qaçmaqla bu əməliyyatı sürətləndirdi. Artıq separatçı rejim təslim olduğunu açıq şəkildə bəyan etdi və bu rejimi təmsil edən “rəsmilər”in Azərbaycan Prezident Administrasiyasının təklif etdiyi Yevlax şəhərində planlaşdırılan danışıqlarda iştirakı da təsdiqlədi. Separatçı rejim Azərbaycanın şərtlərini qəbul etmək məcburiyyətindədir. Ayrı yolları yoxdur”, - deyə Ə.Bədəlov bildirib.
Bölmənin digər xəbərləri
