Bakı, 17 yanvar (AZƏRTAC). Azərbaycan xalqının azadlıq mübarizəsinin təcəssümü olan 20 Yanvar qırğınının 23-cü ildönümü ilə əlaqədar ARDNŞ-in idarə və müəssisələrində silsilə tədbirlər keçirilir.

AZƏRTAC xəbər verir ki, yanvarın 17-də “Azneft” İstehsalat Birliyində (İB) 1990-cı ilin Yanvar hadisələrinə həsr edilmiş anma tədbiri təşkil olunmuşdur. İB-nin baş direktoru Daşqın İsgəndərov 20 Yanvar şəhidlərinin şücaətindən söz açaraq onların xatirəsinin Azərbaycan xalqının qəlbində daim yaşayacağını bildirmişdir.

Qeyd olunmuşdur ki, Azərbaycanın müstəqilliyi və suverenliyi uğrunda canlarını fəda etmiş 20 Yanvar şəhidlərinin xatirəsi xalqımızın ümummilli lideri Heydər Əliyev tərəfindən daim əziz tutulmuş, qanlı hadisələrə ilk dəfə hüquqi-siyasi qiyməti də məhz ulu öndər vermişdir. Birliyin baş mühəndisi - baş direktorun birinci müavini Balamirzə Ağarəhimov, Ə.Əmirov adına NQÇİ-nin rəisi Ramin Quliyev, N.Nərimanov adına NQÇİ-nin rəisi Xaliq Şəfiyev çıxış edərək 1990-cı il yanvarın 19-dan 20-ə keçən gecə sovet silahlı qüvvələrinin Azərbaycan xalqına qarşı törətdiyi bu vəhşi və qəddar hadisələrdən danışmış, şəhidlərin əziz xatirəsinin Azərbaycan xalqının qəlbində daim yaşayacağını bildirmişlər.

x x x

Heydər Əliyev adına Bakı dərin özüllər zavodunda (BDÖZ) keçirilmiş tədbirdə əvvəlcə Vətən uğrunda həlak olan qəhrəman övladların əziz xatirəsi bir dəqiqəlik sükutla yad edilmişdir. Zavodun direktoru Ayaz Qarayev 20 Yanvar hadisələri zamanı Azərbaycan oğul və qızlarının Vətən sevgisindən, ölümdən belə çəkinmədən hamılıqla sovet imperiyasına qarşı azadlıq uğrunda mübarizəyə qalxmasından söhbət açmış, o çətin və ağır günlərdə xalqımızın ümummilli lideri Heydər Əliyevin Bakıda baş vermiş hadisələri bütün dünyaya bəyan etməsini və törədilmiş qanlı cinayətlərə görə böyük bir imperiyaya qarşı cəsarətlə ittihamlar irəli sürməsini, bütün varlığı ilə daim Azərbaycanla birgə olmasını diqqətə çatdırmışdır.

Qeyd olunmuşdur ki, faciə zamanı canını qurban vermiş Vətən övladları sırasında Heydər Əliyev adına BDÖZ-ün işçisi Azad Rzayev də şəhidlik zirvəsinə yüksəlmişdir. Zavodun digər əməkdaşı Gülmirzə Ağayev isə həmin qanlı gecədə yaralanaraq “20 Yanvar əlili” statusu alsa da, əmək fəaliyyətini bu gün də davam etdirir.

Sonda tədbir iştirakçıları zavodun ərazisində faciəli günlərdə öz ölkəsinin və xalqının azadlığını, şərəf və ləyaqətini hər şeydən uca tutaraq şəhidlik zirvəsinə yüksəlmiş mərd Vətən övladlarının ölməz xatirəsinə ucaldılmış abidəni ziyarət etmiş, önünə tər çiçək dəstələri düzmüşlər.